Paşinyanın Avropadakı bazar planı çökdü - Rusiya piştaxtalarının yeri görünür

Ermənistanın kənd təsərrüfatı məhsullarının bir hissəsini Rusiya bazarından Avropaya yönəltmək cəhdi hələlik gözlənilən nəticəni verməyib.

Publika.az xəbər verir ki, Avropa Komissiyasının məlumatlarına əsasən, may və iyun aylarında Avropa İttifaqı (Aİ) Ermənistandan cəmi 364 min avro dəyərində tərəvəz, meyvə və gül alıb. Bunun 37 min avrosu güllərin, 117 min avrosu isə meyvələrin payına düşüb.

Müqayisə üçün, ötən ilin eyni iki ayında bu məhsulların Rusiyaya ixracından Ermənistan 36 milyon dollardan çox gəlir əldə edib. "Baza"nın hesablamalarına görə, Aİ-nin Ermənistan fermerlərindən aldığı məhsulların dəyəri Rusiyadakı göstəricidən 80 dəfə azdır.

Qeyd edək ki, 2026-cı ilin may ayının sonundan etibarən Rusiyanın “Rosselxoznadzor” qurumu Ermənistandan bir sıra məhsulların idxalına mərhələli məhdudiyyətlər tətbiq edib. Məhdudiyyətlər meyvə, tərəvəz və güllərlə yanaşı, süd və balıq məhsullarına da şamil olunub.

Ekspertlər Rusiya ilə ticarətin daha da azalmasının Ermənistan iqtisadiyyatına ciddi təsir göstərə biləcəyi barədə xəbərdarlıq ediblər. Belə ki, ölkənin ÜDM-nin 3,7 faiz, ixracının isə 10 faiz azala biləcəyi bildirilir.

Xatırladaq ki, Ermənistanın baş naziri Nikol Paşinyan bundan əvvəl yerli məhsulların Avropa bazarlarına çıxarılmasını sürətləndirmək niyyətində olduqlarını açıqlamışdı.

Müəllif: Adəm