Ərdoğanın bu sözləri gündəm oldu: Müharibə mesajı verdi

# Erdoğan’ın sözləri dünyada gündəm oldu: “Türkiyə savaştan çəkinməz”

Türkiyə prezidenti Rəcəb Tayyib Ərdoğanın Qətərin “Əl-Cəzirə” telekanalına verdiyi müsahibədə səsləndirdiyi açıqlamalar beynəlxalq mediada geniş əks-səda doğurub.

Publika.az xəbər verir ki, Ərdoğan müsahibəsində Türkiyənin xarici siyasəti, Yaxın Şərqdəki proseslər və Qəzzadakı vəziyyətlə bağlı mühüm mesajlar verib.

Ərdoğan Türkiyə, Səudiyyə Ərəbistanı və Pakistan arasında imzalanan Məkkə Anlaşmasının dünya sülhü baxımından mühüm mesaj olduğunu bildirib. O, bu əməkdaşlığın gələcəkdə genişlənə biləcəyini, Misirin də təşəbbüs göstərməsi halında prosesə qoşulmasının mümkün olduğunu qeyd edib.

Türkiyə lideri Qəzzanın isə heç vaxt tək buraxılmayacağını vurğulayıb.

Ərdoğanın İsraillə bağlı açıqlamaları isə xüsusilə diqqət çəkib. O, İsraili İranla müharibənin əsas aktoru olmaqda və bölgədə müharibəni təşviq etməkdə ittiham edib.

Ən çox müzakirə olunan mesaj isə Türkiyəyə qarşı mümkün müharibə ilə bağlı olub. Ərdoğan bildirib: “Türkiyəyə barış deyil, savaş üçün hücum edənlər olarsa, Türkiyə bu savaşdan da çəkinməz, qaçmaz”.

Onun bu sözləri Rusiya, Yaxın Şərq və Avropa mediasında geniş işıqlandırılıb. “Russia Today” və “Sputnik” Ərdoğanın İsrailin bölgədəki aqressiv siyasəti ilə bağlı fikirlərinə diqqət çəkib. “Arab News” isə Misirin Məkkə İttifaqına qoşula biləcəyi barədə mesajını ön plana çıxarıb.

Yunanıstanın “Kathimerini” qəzeti isə Ərdoğanın Avropa İttifaqına üzvlüyün artıq Türkiyə üçün əvvəlki kimi prioritet olmadığını söyləməsinə diqqət yetirib.

Akqabay