Ankara çıxılmaz vəziyyətdə: F-35 üçün görün hansı ölkələrlə danışıq aparır

ABŞ-ın Türkiyəyə F-35 qırıcılarının satışı ilə bağlı planı Rusiyadan alınan S-400 zenit-raket kompleksləri səbəbindən yenidən sual altına düşüb.

Publika.az xəbər verir ki, bu barədə ABŞ senatoru, Florida ştatından respublikaçı Rik Skott “Semafor”a açıqlamasında bildirib.

Məlumata görə, Türkiyənin F-35-ləri əldə etməsi üçün ABŞ qanunvericiliyi Ankaranın Rusiyanın S-400 sistemlərindən imtina etməsini tələb edir. Türkiyə artıq altı F-35 qırıcısının pulunu ödəsə də, təyyarələr hələ də ABŞ-da saxlanılır.

Skott bildirib ki, S-400-lərin zərərsizləşdirilməsi mümkün variantlardan biridir. Lakin bu addım Konqresdə ciddi narazılıq yarada bilər. Senatorun sözlərinə görə, Türkiyə S-400-ləri saxladığı müddətdə F-35-lərə sahib olmamalıdır.

Ankara isə Rusiya istehsalı olan hava hücumundan müdafiə sistemlərini satmaq üçün müxtəlif variantları nəzərdən keçirir. Türkiyənin ötən aydan etibarən S-400-lərin Birləşmiş Ərəb Əmirliklərinə satılması ilə bağlı danışıqlar apardığı bildirilir. Cənubi Koreya da mümkün alıcılardan biri kimi göstərilir.

F-35 məsələsini ABŞ prezidenti Donald Tramp ötən ay NATO sammitində Türkiyə prezidenti Rəcəb Tayyib Ərdoğanla görüşü zamanı gündəmə gətirib. Lakin İsrailin baş naziri Benyamin Netanyahu Türkiyəyə F-35 satışının Yaxın Şərqdə qüvvələr balansını poza biləcəyi barədə xəbərdarlıq edib.

Akqabay