Paşinyan hökumətinə qarşı ağır ittiham: Bu yolla siyasi rəqiblərilə hesablaşır

Ermənistan müxalifətinin 2 mindən çox nümayəndəsinin həbsdə olduğu iddia edilir.

Publika.az xəbər verir ki, bu barədə teleaparıcı Armen Qasparyan bildirib.

O, sabiq prezident Robert Köçəryanın həbsindən sonra Ermənistanda baş verənləri 1937-ci il repressiyaları ilə müqayisə edib və müxalifətin təqibinə görə siyasi məsuliyyəti baş nazir Nikol Paşinyanın hökumətinin üzərinə qoyub.

Qeyd edək ki, avqustun 25-də Robert Köçəryan və oğlu Sedrak Köçəryan saxlanılıb. Ermənistanın Korrupsiyaya Qarşı Mübarizə Komitəsi hər iki şəxs barəsində həbs tədbirinin tətbiq edildiyini təsdiqləyib. Cinayət işi üzrə ümumilikdə 9 nəfər təqsirləndirilir.

İstintaq Köçəryanı dövlət əmlakının qanunsuz çıxarılması və külli miqdarda rüşvət almaqda şübhəli bilir. Hüquq-mühafizə orqanlarının versiyasına görə, dövlət obyektləri aşağı qiymətlərlə əldə edilərək sonradan Köçəryanın ailə üzvlərinin və onunla əlaqəli şirkətlərin adına rəsmiləşdirilib.

İş materiallarında İrəvanda bir sıra torpaq sahələri və daşınmaz əmlak obyektləri də yer alır. Onlardan biri ümumi dəyəri 2,63 milyard dram olan 56 obyektlə bağlıdır.

Köçəryanın müdafiəsi ittihamları rədd edir. Vəkil Aram Orbelyanın sözlərinə görə, əmlakın özgəninkiləşdirilməsi ilə bağlı qərarları hökumət qəbul edib və Köçəryanın prezident kimi fəaliyyəti həmin dövrdə qüvvədə olan Konstitusiyaya uyğun olub.

Köçəryanın tərəfdarları isə istintaqı hakimiyyətin siyasi rəqiblərlə hesablaşmaq cəhdi kimi qiymətləndirirlər.

Müəllif: Adəm