Paşinyanın dəmir yolu planı Moskvanı qəzəbləndirdi - Görün Lavrov necə reaksiya verdi

Rusiya xarici işlər naziri Sergey Lavrov Ermənistanın baş naziri Nikol Paşinyanın dəmir yollarının konsessiyasının üçüncü ölkəyə satılması ilə bağlı təklifinə təəccübləndiyini bildirib.

Publika.az xəbər verir ki, Lavrov bu barədə RBK-ya müsahibəsində danışıb.

O qeyd edib ki, Rusiya və Ermənistan baş nazir müavinləri səviyyəsində mütəmadi əlaqə saxlayır və İrəvanı narahat edən istənilən məsələ, o cümlədən Cənubi Qafqaz Dəmir Yollarının taleyi müzakirə oluna bilər.

“Əgər belə məsələlər yaranıbsa, tərəfdaşına bu barədə necə düşündüyünü danış. Bunun əvəzinə açıq şəkildə bəyan edilir ki, biz onlara 2 milyard dollar borcluyuq”, - Lavrov deyib.

Rusiya XİN rəhbəri əlavə edib ki, Ermənistanın bu yanaşması iqtisadi qiymətləndirmələrlə yanaşı, Rusiya vətəndaşlarında emosional reaksiya da doğurur.

“Başa düşürəm ki, bu, iqtisadi təhlilə əsaslanan qiymətləndirmələrdən əlavə, vətəndaşlarımızda emosional reaksiya da yaradır. Mən də istisna deyiləm”, - Lavrov vurğulayıb.

Qeyd edək ki, Nikol Paşinyan avqustun 24-də Rusiyanın Ermənistan dəmir yollarının konsessiya hüququnu təxminən 400 milyon dollara sata biləcəyini bildirib. Daha sonra o, İrəvanın bu konsessiyanın üçüncü ölkəyə verilməsi məsələsini Moskva qarşısında qaldırdığını açıqlayıb.

Müəllif: Adəm