Türkiyə Nuhun gəmisinin izinə düşdü - Ərazidə anomaliyalar aşkar edildi

Ağrı dağının zirvəsi yaxınlığında Nuhun gəmisinin axtarışı zamanı anomaliyalar aşkarlanıb.

Publika.az xəbər verir ki, bu barədə “Milliyet” qəzeti məlumat yayıb.

Tədqiqatçılar Türkiyədə bəzi şəxslərin Nuhun gəmisinin yerləşdiyi ərazi hesab etdiyi Durupınar qaya formasiyası ərazisində yeraltı boşluqlar və digər anomaliyalar aşkar ediblər. Radiolokasiya skanının nəticələrinin iki ay ərzində əldə ediləcəyi gözlənilir.

Layihənin rəhbəri, professor Cenker Atılın sözlərinə görə, mütəxəssislər ərazinin üçölçülü modellərini hazırlayıb və yeraltı skan aparıblar. Formasiyanın daxilində xarici hissə ilə müqayisədə 40 faiz daha çox karbon aşkar edilib ki, bu da üzvi maddənin və ya ağac materialının mövcudluğuna işarə edə bilər.

Formasiyanın uzunluğu təxminən 164 metrdir ki, bu da Əhdi-Ətiqdə gəminin ölçüsü kimi təsvir edilən təxminən 300 qədim qulac ölçüsünə uyğundur. Tədqiqatçılar təxminən min torpaq nümunəsi götürməyi, daha sonra əldə olunan məlumatları qiymətləndirməyi planlaşdırırlar.

Hüseyn İbadlı