İstanbulda 28 mərtəbəli binada yanğın - 42 nəfər tüstüdən zəhərləndi

Sentyabrın 2-də İstanbulun Esenyurt rayonunda yaşayış kompleksinin avtomobil dayanacağında başlayan yanğın 28 mərtəbəli binaya yayılıb. Hadisə zamanı 42 nəfər tüstüdən zəhərlənib.

Publika.az xəbər verir ki, yanğın Yeşilkent məhəlləsində baş verib. Məlumata görə, yaşayış kompleksinin otoparkında dayanan avtomobillərdən biri naməlum səbəbdən alovlanıb. Qısa müddətdə böyüyən yanğın binaya keçib. Bina sakinləri öz imkanları hesabına ərazidən çıxıblar.

Hadisə yerinə yanğınsöndürənlərlə yanaşı, polis, səhiyyə və AFAD qrupları göndərilib. Yanğın nəzarətə götürülərək söndürülüb, polis əməkdaşları isə ərazidə təhlükəsizlik tədbirləri görüblər.

Tüstüdən təsirlənən 42 nəfərdən bəzilərinə hadisə yerində tibbi yardım göstərilib. Digərləri isə ilkin müdaxilədən sonra təcili tibbi yardım avtomobilləri ilə xəstəxanaya aparılıb.

Daha sonra binanın sakinlərinin evlərinə qayıtmasına icazə verilib.

Yanğının hansı səbəbdən baş verdiyinin müəyyənləşdirilməsi üçün araşdırma başladılıb.