Region

Paşinyan: Son zamanlar Leninlə daha çox maraqlanıram

5 Sentyabr 2026 13:50

Ermənistanın Baş naziri Nikol Paşinyan son zamanlar Lenin, Mao Çzedun, Napoleon və digər inqilab liderləri ilə daha çox maraqlandığını bildirib.

Publika.az xəbər verir ki, o, bu barədə Təhlükəsizlik Şurasının keçmiş katibi Armen Qriqoryanın "Addım at, Serji devir" adlı kitabının təqdimatında danışıb. Kitab 2018-ci ildə Ermənistanda baş vermiş "Məxməri inqilab" haqqındadır. Paşinyan "Məxməri inqilab"dan söz açan zaman səkkiz il əvvəlki hadisələri uğur hekayəsi adlandırıb.

Lakin o qeyd edib ki, belə bir ifadə müharibədə həlak olmuş erməni hərbçilərinə və ümumilikdə Qarabağ ermənilərinə qarşı münasibətdə sərt səslənə bilər. Baş nazirin sözlərinə görə, bunu qəbul etmək həm özü, həm də tərəfdarları üçün olduqca ağırdır.
Paşinyan həmçinin baş nazir olduğu günü dəfələrlə "lənətlədiyini" bildirib.

İnqilabın uğurundan danışan siyasətçi bunu ilk növbədə Ermənistan dövlətçiliyinin qorunması ilə əlaqələndirib.

Müəllif: Tural