İran alternativ yol axtarışında: Tehran həm Ermənistanı qorumaq istəyir, həm də...

İrana qarşı təzyiqi artırmaq və onun quru, hava və dəniz imkanlarını məhdudlaşdırmaq cəhdləri fonunda Tehran alternativ yollar axtarır. Ermənistandan keçən marşrut ölkə üçün hələ də çox vacibdir.

Publika.az xəbər verir ki, bunu İranın siyasi şərhçisi və Ermənistan-İran Strateji Əməkdaşlıq Mərkəzinin təsisçisi Puya Hüseyni “Sputnik Armenia”ya verdiyi müsahibədə bildirib.

Onun sözlərinə görə, Ermənistandan keçən marşrut İran üçün strateji əhəmiyyət kəsb edir, çünki bu, Türkiyədən Avropaya yeganə alternativ quru yoludur. Ekspert izah edib ki, son illərdə, xüsusən də son aylarda İranın Ermənistanda Şimal-Cənub avtomobil yolunun tikintisinə marağını artması təsadüfi deyil.

Hüseyni qeyd edib ki, yolun "Agarak-Qacaran hissəsini İran şirkəti (“Abad Rahan Pars International Group” və “Tunel Sadd Ariana”dan ibarət konsorsium) tikir. İranın yüksək vəzifəli şəxsləri dəfələrlə Ermənistana və tikinti sahəsinə səfər ediblər. Bu, Ermənistan marşrutunun İran üçün nə qədər vacib olduğunu göstərir".

O, həmçinin qeyd edib ki, Ermənistandan keçən marşrutun əhəmiyyəti Tehranın iki ölkə sərhədində hər hansı bir dəyişikliyin qəbuledilməzliyi ilə bağlı rəsmi mövqeyində də əks olunur.

"Bu, əslində İranın Türkiyədən asılı olmayaraq Avropaya aparan yeganə quru yoludur və böyük strateji əhəmiyyətə malikdir. İranın yüksək vəzifəli rəsmiləri bu barədə həmişə danışıblar", - deyə o vurğulayıb.

Hüseyni vurğulayıb ki, İranın geniş ərazisi və uzun sərhədləri Tehrana nəqliyyat marşrutlarını şaxələndirməyə və quru təcrid riskini azaltmağa imkan verir.

Hüseyni Araz dəhlizinə də toxunub. Ekspert vurğulayıb ki, Tehranın bu marşrutu işə salmaq qərarı birbaşa "Zəngəzur dəhlizi" adlanan ərazinin yaranması ilə bağlıdır. Azərbaycan Sünikdən keçən nəqliyyat marşrutu ideyasını açıq şəkildə təbliğ etməyə başlayanda İran alternativ təklif edib: Azərbaycanla Naxçıvan arasında öz ərazisi vasitəsilə əlaqə yaratmaq.

Hüseyni qeyd edib ki, "İran Ermənistana qarşı bu təhlükəni neytrallaşdırmaq üçün öz ərazisindən və nəzarəti altında bir marşrut təmin etmək qərarına gəlib".

Onun sözlərinə görə, Tehran bununla Azərbaycan üçün alternativ marşrut yaratmağa və eyni zamanda Zəngəzur dəhlizi ilə bağlı Ermənistana təzyiqi azaltmağa çalışırdı.

Müəllif: Tural