Nə qədər ki, Paşinyan var, Rusiya ilə Ermənistanın münasibətləri düzəlməyəcək - Zatulin

Rusiya Dövlət Dumasının MDB İşləri Komitəsinin sədr müavini Konstantin Zatulin bildirib ki, Nikol Paşinyanın hakimiyyəti dövründə Ermənistanla Rusiya arasında münasibətlərdə, o cümlədən ticarət-iqtisadi əlaqələrdə heç bir irəliləyiş gözlənilmir.

Publika.az xəbər verir ki, rusiyalı deputatın sözlərinə görə, ikitərəfli münasibətlərdəki hazırkı gərginliyin əsas səbəbi Ermənistan hakimiyyətinin yürütdüyü siyasətdir. O qeyd edib ki, İrəvan Moskvaya qarşı çıxan qüvvələrlə əməkdaşlıq edir və yeni ittifaqlar qurmağa çalışır.

Zatulinin sözlərinə görə, Paşinyan ölkəyə rəhbərlik etməyə davam etdiyi müddətcə Ermənistanla Rusiya arasında hətta vaxtaşırı təmaslar belə vəziyyəti əhəmiyyətli dərəcədə dəyişə bilməz.

Rusiya Dövlət Dumasının nümayəndəsi həmçinin bildirib ki, Rusiya Ermənistanın mümkün təzyiqinə və ya şantajına boyun əyməyəcək.

Ermənistanın Avropa İttifaqına qoşulma ehtimalına toxunan Zatulin, Paşinyanın belə bir məsələ ilə bağlı referendum keçirməyəcəyini bildirib. O hesab edir ki, Baş nazir referendum keçiriləcəyi təqdirdə müvafiq təşəbbüsün lazımi dəstəyi almayacağından narahatdır.

Müəllif: Tural