Region

Türkiyədə cinsi azlıqlara qarşı genişmiqyaslı əməliyyat keçirildi

13 Sentyabr 2026 19:39

Türkiyədə LGBTİ+ icmasına qarşı genişmiqyaslı əməliyyat keçirilib.

Publika.az xəbər verir ki, Türkiyənin ədliyyə naziri Akın Gürlek “Ailem güvəndədir” adı altında keçirilən əməliyyatlar çərçivəsində 162 şübhəli, 9 dərnək və 13 müəssisə barədə hüquqi tədbirlər görüldüyünü açıqlayıb.

Məlumata görə, İstanbul, Ankara, İzmir, Aydın və Mersin baş prokurorluqlarının koordinasiyası ilə həyata keçirilən əməliyyatlar ümumilikdə 15 vilayəti əhatə edib. Əməliyyatlara polis və jandarma əməkdaşları cəlb olunub.

Araşdırmalar zamanı gizli əməkdaşlardan, texniki və fiziki izləmədən, şahid ifadələrindən, rəqəmsal materialların və görüntülərin təhlilindən istifadə edildiyi bildirilib. Keçirilən əməliyyatlar zamanı narkotik maddələr və çoxsaylı rəqəmsal materiallar müsadirə olunub, bir sıra sosial media hesabları və internet saytlarına girişin məhdudlaşdırılması barədə qərarlar qəbul edilib.

Nazir əməliyyatlar zamanı neçə nəfərin saxlanıldığını açıqlamayıb.