Türkiyədə nəhəng əməliyyat: 1 613 şübhəli saxlanıldı - 940 milyon manatlıq dövriyyə

Türkiyədə cinayətkar qruplaşmalara qarşı keçirilən əməliyyatlar nəticəsində 1 613 şübhəli şəxs saxlanılıb.

Publika.az xəbər verir ki, bunu Türkiyənin ədliyyə naziri Akın Gürlek “X” sosial şəbəkə hesabında açıqlayıb.

Nazirin məlumatına görə, ölkə üzrə 78 Baş Prokurorluğun koordinasiyası ilə 151 əməliyyat həyata keçirilib. Əməliyyatlar çərçivəsində saxlanılan 1 613 şübhəlidən 618-i barədə həbs qərarı verilib.

Axtarışlar zamanı 199 odlu silah, 9 039 patron və mərmi, 2 əl qumbarası, 10 520 ədəd sintetik narkotik vasitə və narkotik həb, həmçinin 37,25 kiloqrama yaxın narkotik maddə aşkarlanaraq götürülüb.

İstintaq çərçivəsində cinayətkar fəaliyyətlə əlaqəli olduğu bildirilən 26,9 milyard türk lirəsi, yəni təxminən 940,53 milyon manat həcmində maliyyə dövriyyəsi müəyyən edilib.

Bundan başqa, 408 bank hesabı, 35 daşınmaz əmlak, 31 nəqliyyat vasitəsi və 10 şirkət müsadirə olunub.

Akın Gürlek əməliyyatlardan yayınan şübhəlilərin saxlanılması istiqamətində tədbirlərin və digər araşdırmaların davam etdiyini bildirib.