Ermənistanda MTX binasına “Molotov kokteyli” atan şəxs Paşinyana “qohum” çıxdı

Ermənistan Milli Təhlükəsizlik Xidmətinin binasına “Molotov kokteyli” atan Raffi Mandalyanın hakim “Mülkü Müqavilə” Partiyasının deputatı Hakob Simidyanın xaç oğlu olduğu ortaya çıxıb.

Publika.az xəbər verir ki, bu barədə “Joqovurd” qəzeti məlumat yayıb.

Mandalyan MTX binasına “Molotov kokteyli” atdıqdan sonra saxlanılıb.

Simidyan (Ermənistanın baş naziri Nikol Paşinyanın xaç oğlu) qəzet müxbiri ilə söhbətində ailəsinin Mandalyanla əlaqəsini inkar etməyib və qeyd edib ki, onun hərəkətlərindən özü də təəccüblənib.

Deputatın sözlərinə görə, Raffi, görünür, "özünü pis bir mühitdə tapıb".

Bu arada, Mandalyan özü ifadəsində hərəkətlərini hər hansı bir qrupun və ya şəxsin təsiri ilə deyil, ölkənin təhlükəsizliyi ilə bağlı narahatlığı ilə əlaqələndirib. O, ümumi sükutu "pozmaq" və "hər kəsin vətənin taleyinə laqeyd olmadığını" göstərmək istədiyini bildirib.

Mandalyan izah edib ki, MTX binasına gedib və şüşələri atdıqdan sonra orada qalıb hüquq-mühafizə orqanlarının gəlməsini gözləyib. Məhkəmədə o, hakimə müraciət edərək deyib: "Vətən təhlükədədir! Narahat deyilsiniz?!"

Mandalyan həbs edilib və Nubaraşen həbsxanasında saxlanılır. O, ixtisasca baytardır.

Ermənistan İstintaq Komitəsindən “Sputnik Ermənistan”a əvvəllər bildirilib ki, həmin şəxs terrorizmdə ittiham olunur. Cinayət işi Ermənistan Cinayət Məcəlləsinin "yandırma, partlatma və ya digər üsullarla əmlakın məhv edilməsi və ya zədələnməsi" (Ermənistan Cinayət Məcəlləsinin 264-cü maddəsi), "xuliqanlıq" (Ermənistan Cinayət Məcəlləsinin 297-ci maddəsi) və "terrorizm" (308-ci maddə) maddələri ilə başlanıb.

Müəllif: Tural