İrəvan Qərbə gedir, Moskva hesabı xatırladır: Bunun bədəli olacaq!

Rusiya Ermənistanın Avropa İttifaqına inteqrasiya prosesini maliyyələşdirmək niyyətində deyil.

Publika.az xəbər verir ki, bunu Rusiya Təhlükəsizlik Şurasının katibi Sergey Şoyqu bildirib. O qeyd edib ki, Ermənistanın bu istiqamətdə atacağı hər addımın iqtisadi nəticələri olacaq.

Şoyqunun sözlərinə görə, rəsmi İrəvan son dövrlərdə Avrasiya İqtisadi İttifaqı (Aİİ) və Kollektiv Təhlükəsizlik Müqaviləsi Təşkilatına (KTMT) münasibətdə “istehlakçı yanaşması” nümayiş etdirir, eyni zamanda NATO ilə hərbi əməkdaşlığı genişləndirməyə çalışır.

O, həmçinin Ermənistanda Rusiya biznesinə təzyiqlərin artdığını və ayrı-ayrı sahə və müəssisələrlə bağlı baş verənləri “reydər ələ keçirməsi” kimi qiymətləndirib.

Şoyqu bildirib ki, 1990-cı illərdə Rusiya Ermənistanı iqtisadi və enerji böhranından çıxarıb. Onun sözlərinə görə, Ermənistanın Aİİ-də üzvlüyünün ilk 10 ili ərzində ölkə iqtisadiyyatı təxminən üç dəfə böyüyüb.

“Hazırkı hakimiyyət isə Rusiya ilə əlaqələri kəsmək və Qərblə əməkdaşlığı gücləndirmək kursunu götürüb”, - deyə Şoyqu vurğulayıb.

Müəllif: Adəm Abbaslı