Rezaidən şok sözlər: "Tramp və Netanyahu sağ qurtula bilməyəcək"

İranın Ali Milli Təhlükəsizlik Şurasının katibi Möhsün Rezai ABŞ Prezidenti Donald Trampın İrana qarşı yanlış addımlar atdığını anladığını bildirib. O, İsrailin Baş naziri Benyamin Netanyahunun da Tramp kimi “sağ qurtula bilməyəcəyini” deyib.

Publika.az “Fars” agentliyinə istinadən xəbər verir ki, Rezai ABŞ-ın İran qarşısında məqsədlərinə nail ola bilmədiyini iddia edib.

“Biz sübut etdik ki, Amerika İranla bacara bilmədi və gələcəkdə iki rəqib güclə müharibədə də ciddi problemlərlə üzləşəcək”, – iranlı general vurğulayıb.

Rezainin sözlərinə görə, İran raketi “Corc Vaşinqton” təyyarədaşıyan gəmisinin üzərində partlayıb. O, həmçinin ABŞ sualtı qayığına qarşı tərs mühəndislik tətbiq etdiklərini bildirib.

“Bu sualtı qayıq okeanda 6 min metrədək kəşfiyyat aparır və fövqəladə dərəcədə dəyərlidir. Bəlkə də gələcəkdə bəzi ölkələr bizə onun texnologiyasını bölüşməyi təklif edəcək və bunun müqabilində bir neçə milyard dollar ödəyəcək”, – Rezai qeyd edib.

Ali Milli Təhlükəsizlik Şurasının katibi ABŞ ilə mümkün danışıqlara da münasibət bildirib. O deyib ki, Tehran “keçmiş diplomatiyaya, İslamabad vəziyyətinə və ondan əvvəlki dövrə qayıtmır”.

Rezainin sözlərinə görə, ABŞ əvvəlcə İranın irəli sürdüyü 7 şərti yerinə yetirməlidir. Əks halda, onun sözlərinə görə, nə Hörmüz boğazı açılacaq, nə də danışıqlar başlayacaq.

Qeyd edək ki, İranın xarici işlər naziri Abbas Əraqçi Tehranın 7 şərtini ABŞ rəsmilərinə təqdim edib.

Ləman