Pezeşkian: İran ABŞ qarşısında heç vaxt baş əyməyəcək

İran Prezidenti Məsud Pezeşkian ölkəsinin ABŞ qarşısında heç vaxt baş əyməyəcəyini bildirib.

Publika.az xəbər verir ki, Pezeşkian bu barədə BMT Baş Assambleyasının iclasında çıxışı zamanı danışıb.

İran lideri çıxışına müharibənin əvvəlində İranda ibtidai məktəbə endirilən zərbəni xatırlatmaqla başlayıb.

“Biz terrorizmin qurbanı olmuşuq”, – Pezeşkian deyib.

Onun sözlərinə görə, İran heç bir ölkəyə Hörmüz boğazından “öz təcavüzünü tətbiq etmək” üçün istifadə etməyə imkan verməyəcək.

Pezeşkian həmçinin İranın nüvə texnologiyalarından “cəmiyyətləri silahlarla təhdid etmək üçün deyil, tərəqqi naminə” istifadə etməyə çalışdığını bildirib.

Qeyd edək ki, Pezeşkian BMT Baş Assambleyasının iclasının səhər hissəsində çıxış edən beşinci natiq olub. Onun çıxışından bir neçə dəqiqə sonra zalda olan yeganə ABŞ nümayəndəsi ayağa qalxaraq iclası tərk edib.

Bundan əvvəl ABŞ Prezidenti Donald Tramp İranla bağlı “böyük qərar” qəbul etməli olduqlarını bildirib. O, ya Konqresə aralıq seçkilərdən sonra İranla razılaşma əldə ediləcəyini, ya da ölkənin “məhv ediləcəyini” deyib.

Ləman