Ermənistanda maşınların sayı artır, tıxac yaranır - Paşinyan həll yolunu göstərdi

Ermənistanda avtomobillərin sayının artması ölkənin əsas yollarında hərəkətlə bağlı problemləri gündəmə gətirib.

Publika.az xəbər verir ki, Ermənistanın baş naziri Nikol Paşinyan oktyabrın 1-də hökumətin iclasında yol tikintisi proqramlarını müzakirə edərkən yaxın vaxtlarda dövlətlərarası və respublika əhəmiyyətli yollarda tıxac probleminin yaranacağını bildirib.

Onun sözlərinə görə, bəzi günlərdə və mövsümlərdə həmin yollarda hərəkət çətinliyi artıq müşahidə olunur. Buna görə də mövcud marşrutlara alternativ yolların yaradılması zəruridir.

Paşinyan Tavuş vilayətindəki Yenokavan-Qırmızısu yolunun əsaslı təmirinə də toxunub. Bildirib ki, hazırda torpaq olan bu yol ilk dəfə asfaltlanacaq. Baş nazir Atan-Yenokavan yolunun tikintisinin strateji əhəmiyyət daşıdığını da vurğulayıb.

O, Aygeovit-Vazaşen-Paravakar-Aygepar yolunun əsaslı təmirindən sonra Berd şəhərinə aparan daha bir abad yolun yaranacağını qeyd edib.

Paşinyanın fikrincə, yol infrastrukturunun yaxşılaşdırılması Berd və ətraf yaşayış məntəqələrində iqtisadi və turizm fəallığının artmasına imkan verə bilər.

Müəllif: Adəm Abbaslı