Paşinyandan Azərbaycanla sülh açıqlaması: Prosesi sona çatdırmalıyıq

Ermənistan hökuməti Azərbaycanla sülhə olan ictimai inamı sülh sazişinin imzalanması və ratifikasiyası ilə yekun nəticəyə çevirməlidir.

Publika.az xəbər verir ki, bunu Ermənistanın baş naziri Nikol Paşinyan hökumətin iclasında deyib.

Paşinyanın sözlərinə görə, iqtisadi fəallıq və daşınmaz əmlak bazarındakı göstəricilər vətəndaşların sülhlə bağlı nikbinliyini göstərir. O bildirib ki, iqtisadi göstəricilər sülhə inamı ifadə edir.

Baş nazir qeyd edib ki, sülh artıq reallığa çevrilib, lakin hələ tam şəkildə institusionallaşmayıb. Onun sözlərinə görə, hökumət insanların gözləntilərini doğrultmalı və Azərbaycanla sülh prosesini sona çatdırmalıdır.

Paşinyan bildirib ki, hazırda aralıq mərhələyə çatılıb və yekun mərhələyə doğru irəliləmək lazımdır.

O, sülh sazişinin imzalanması və ratifikasiyası ilə yanaşı, TRIPP layihəsi, sərhədin delimitasiyası, kommunikasiyaların açılması, Türkiyə ilə proses, “Şimal-Cənub” magistralı və “Sülh kəsişməsi” konsepsiyasını da qeyd edib.

Paşinyan hökumət üzvlərini bu prioritet ətrafında siyasi mesajlar və strategiyalar formalaşdırmağa, diqqəti real problemlərə və praktiki həll yollarına yönəltməyə çağırıb.

O əlavə edib ki, gündəlik informasiya səs-küyü hakimiyyətin əsas vəzifənin həyata keçirilməsindən diqqətini yayındırmamalıdır.

Müəllif: Adəm