İstək kifayət deyil, qərar verməlisiniz - Paşinyandan Avropa İttifaqına çağırış

Ermənistanın Avropa İttifaqına qoşulması yalnız mümkün ssenarilərdən biridir, çünki ölkənin Aİ üzvü olmaq istəyi məsələni həll etmək üçün kifayət deyil.

Publika.az xəbər verir ki, bunu Ermənistanın Baş naziri Nikol Paşinyan “Radio France Internationale” (RFI)-yə verdiyi müsahibədə bildirib.

Baş nazir qeyd edib ki, "Məsələni həll etmək üçün təkcə Ermənistanın istəyi kifayət deyil: Avropa İttifaqı özü də daha da genişlənmənin məqsədəuyğun olub-olmadığına qərar verməlidir".

O, bu gün də Aİ daxilində bu məsələ ilə bağlı fərqli fikirlərin olduğunu qeyd edib.

Paşinyan əlavə edib ki, hökumətin strateji məqsədi Ermənistanın Avropa İttifaqına qoşulub-qoşulmaması deyil, ölkə və xalqı üçün əvvəllər çatışmayan alternativlər yaratmaqdır.

“Məqsəd alternativlər təklif etməkdir və sonra cəmiyyət Ermənistanın AİB-də qalıb-qalmayacağına, Aİ-yə qoşulmaq istəyib-istəmədiyinə, yoxsa heç bir ittifaqa qoşulmaq istəmədiyinə qərar verə biləcək. Hər halda, qalib biz olacağıq, çünki islahatlar həyata keçirməklə sonda Avropa standartlarına tam uyğun bir dövlətə nail olacağıq”, - deyə Paşinyan əlavə edib.

Eyni zamanda, Ermənistanın Baş naziri bir daha vurğulayıb ki, Ermənistan Rusiya ilə münasibətlərin pisləşməsini istəmir: "Məqsədlərimiz Rusiya Federasiyası ilə münasibətlərin pozulması və ya pisləşməsi olmayıb və olmayacaq da".

Müəllif: Tural