Hazırdır: Ermənistan yeni Konstitusiya layihəsini bu tarixdə dərc edəcək

Ermənistanın yeni Konstitusiyasının layihəsi gələn həftə dərc olunacaq.

Publika.az xəbər verir ki, bu barədə “Joghovurd” qəzeti məlumat yayıb.

Bundan sonra müzakirələr və dinləmələr təşkil olunacaq, daha sonra layihə Ermənistan parlamentinə göndəriləcək.

Qeyd olunur ki, yeni Konstitusiya kontekstində müzakirə olunan müddəalardan biri də hakim komanda daxilində belə yekdilliklə təsdiqlənməmiş münsiflər məhkəməsi institutunun tətbiqidir.

Qəzet iddia edir ki, Mülki Müqavilə Şurasının qapalı iclasında hökumət nümayəndələrinin əksəriyyəti Ermənistanda belə bir sistemin tətbiqinin ciddi problemlər yarada biləcəyindən narahatlıqlarını bildiriblər.

Əsas arqument ondan ibarət idi ki, Ermənistanda hər kəs bir-birini tanıyır, müxtəlif əlaqələri var və münsiflərin tamamilə müstəqil və qərəzsiz qərarlar qəbul edə biləcəyinə dair heç bir zəmanət yoxdur.

Ermənistanın Baş naziri Nikol Paşinyan buna cavab olaraq keçmiş prezident Robert Köçəryan və “Çiçəklənən Ermənistan” partiyasının lideri Qaqik Tsarukyanın məhz "xalqın tələbi ilə" həbs olunduğunu bildirib.

O, münsiflər heyəti institutunun artıq faktiki olaraq mövcud olduğunu və yalnız onu institutlaşdırmaq qaldığını bildirib.

Dünyada bu sistemin müxtəlif modelləri mövcuddur. Bəzi ölkələrdə münsiflər heyəti təqsir məsələsinə ayrıca qərar verir, peşəkar hakim isə prosesin qanuniliyinə nəzarət edir və hökmü müəyyən edir. Həmçinin, münsiflər heyətinin və hakimin qərar qəbuletmədə birgə iştirak etdiyi modellər də mövcuddur.

Ermənistanda hansı modelin seçiləcəyi, münsiflər heyətinin hansı işlər üzrə çağırılacağı, necə seçiləcəyi və xarici təsirlərdən qorunmaq üçün hansı zəmanətlərə malik olacağı tam aydın deyil.

Nəşr qeyd edir ki, yeni Konstitusiyadan İstiqlal Bəyannaməsinə istinad da çıxarılacaq.

Müəllif: Tural