Ermənistan parlamenti TRIPP qanunvericilik paketini bir neçə dəqiqə ərzində təsdiqlədi

Ermənistan Parlamenti birinci oxunuşda TRIPP şirkətinin yaradılması üçün Səhmdar Cəmiyyətlər haqqında Qanuna dəyişiklik edən qanun layihəsini təsdiqləyib.

Publika.az xəbər verir ki, qanun layihəsini parlamentdə ədliyyə nazirinin müavini Tiqran Dadunts təqdim edib.

“Biz Ermənistan hüquq sisteminə beynəlxalq müqavilələr əsasında yaradılan şirkətlər üçün xüsusi hüquqi tənzimləmələr nəzərdə tutan yeni bir qurumun daxil edilməsini təklif edirik. Bu, mövcud qanundan fərdi istisnalar demək deyil, əksinə, bu şirkətlərin fəaliyyəti üçün çevik və proqnozlaşdırıla bilən hüquqi çərçivə deməkdir”, - Dadunts bildirib.

O izah edib ki, enerji, nəqliyyat və infrastruktur layihələri beynəlxalq iqtisadi əməkdaşlıq çərçivəsində həyata keçiriləcək. Onların həyata keçirilməsi üçün, o cümlədən digər ölkələrin iştirakı ilə ayrıca şirkətlər yaradıla bilər.

Daduntsa görə, səhmdar cəmiyyətləri ilə bağlı mövcud qanunvericilik manevr üçün heç bir yer qoymur.

"Beynəlxalq müqavilə korporativ idarəetmə məsələlərini ətraflı şəkildə tənzimləməməlidir və tənzimləyə də bilməz. Bu, razılaşdırılmış idarəetmə modeli ilə ümumi daxili qanunlar arasında ziddiyyətə səbəb ola bilər", - Nazir müavini qeyd edib.

Rəsmi şəxs qeyd edib ki, belə bir qurumun yaradılmasına ehtiyac TRIPP layihəsinin həyata keçirilməsi ilə əlaqədar yaranıb.

Ermənistanın payı 25 faiz və ya daha çox olan şirkətlərə xüsusi qaydalar tətbiq olunacaq.

Hakim partiyanın altmış dörd deputatı qanun layihəsinin qəbul edilməsinin lehinə səs verib. Müxalifət müzakirədə iştirak etməyib.

Noyabrın 10-da Ermənistan prezidenti Vaaqn Xaçaturyan əvvəllər Milli Assambleya tərəfindən təsdiq edilmiş TRIPP layihəsi üzrə Ermənistan və ABŞ arasında çərçivə sazişini təsdiqləyən qanun imzalayıb.

Müəllif: Tural