Bu qış AĞIR KEÇƏCƏK - Professordan dəhşətli virus PROQNOZU

Məktəblərin açılması ilə yoluxucu xəstəliklər artacaq, qışın isə sərt keçəcəyi gözlənilir.

Publika.az xəbər verir ki, bu barədə türkiyəli professor Ayper Somer danışıb. O, bildirib ki, bu payız və qış keçən ildən daha ağır olacaq.

“Çünki yaz və yay ayları çox pis keçdi. Bu qış təkcə COVİD-19 deyil, digər viruslar da var. İndiyə qədər gördüyümüzdən daha aktiv olublar. Ona görə də bütün epidemioloqlar, tədqiqatçılar və infeksionistlər deyirlər ki, bu qış uşaqlar üçün çox çətin keçəcək.

Virusların belə bir xüsusiyyəti var ki, ölümcül təsiri azaldıqda və yoluxuculuğu artdıqda digər viruslar yenidən ortaya çıxmağa başlayır. Bu il gözlədiyimiz bir çox virus xəstəliyi ilə mübarizə apardıq. Birincisi, soyuqdəyməyə səbəb olan rinovirus. Çox ağır xəstələr gəlirdi, palata bronxiolit və ya pnevmoniyaya bənzər xəstələrlə dolu idi.

Koronavirusa yoluxma halları da oldu. İyul və avqust aylarında koronavirusa yoluxanların sayı artdı. Ancaq koronaviruslar digərlərinə nisbətən daha yüngüldür. Hazırda paraqrip tip 1 dediyimiz virus daha çox problem yaradır. Keçən həftə palatanın yarısı paraqrip yoluxmaları ilə dolu idi. Laringit öskürəyə səbəb olur. Ancaq ağciyərlərə də düşə və ağırlaşa bilər, yaxşı ki, ölümcül deyil”.

İshal halları maydan bəri kəsilməyib!

İshalın yay mövsümündən sonra da davam etdiyini vurğulayan Prof. Dr. Somer sözlərinə belə davam edib:

“Bütün viruslarla birlikdə ishal virusları da artıb. Yay üçün xarakterikdir, lakin qızdırma və vəziyyəti ağır olan çoxlu xəstələr gəldi. Hələ də gəlirlər. May ayından bəri qızdırmalı ishal xəstəliklərinin qarşısı alınmayıb. Onların törədicilərini müəyyən etməyə çalışırıq, rotavirus var, ən çox adenoviruslardır. Təbii ki, bir çox başqa viruslar da var ki, onları aşkar etmək mümkün deyil. Həmçinin qızdırmalı tənəffüs yolları infeksiyaları da çox yüksəkdir, pnevmoniya halları keçən yayla müqayisədə xeyli artıb. Normalda tif, paratif kimi xəstəliklər müşahidə olunurdusa, bu il çox deyil. Bütün tənəffüs yolları infeksiyaları ilə yanaşı, koronavirusa yoluxmalarda da artım olacaq”.

Qrip epidemiyası yeni ilin əvvəlindən başlaya bilər

Ekspert qeyd edib ki, məktəblərdə maska ​​istifadəsinin ləğvi uşaqların təkcə koronavirus deyil, digər virus infeksiyalarına da yoluxmasına yol aça bilər:

“Məncə, bu qış uşaqlarımız daha çox xəstələnəcək. Qrip epidemiyası adətən dekabr ayında başlayır. 2 ildir ki, müşahidə olunmur. Amma bu il risk var. Qripin digər viruslarla birlikdə erkən hərəkətə keçəcəyi gözlənilir. Viruslu günlər qarşıdadır. Ona görə də xüsusilə risk qrupunda olan uşaqlara qrip peyvəndini tövsiyə edirik. Bundan başqa xəstə uşaqları, xüsusilə qızdırması, öskürəyi, hətta burnu axan uşaqları bir neçə gün məktəbə göndərmək olmaz. Daha da pisləşirsə, həkimə aparın. Məktəb izdihamlı yerdir. Əslində maska ​​taxmaq çox yaxşıdır. Həmçinin uşaqların qidalanmasına, həkimin tövsiyəsi ilə istifadə edilə bilən vitamin əlavələrinə diqqət yetirmək və çox yaxşı yatmaq lazımdır. Müəllimlər də ayıq-sayıq olmalıdırlar. Uşaq xəstədirsə, onu digərlərindən ayırmaq və mümkün qədər tez xəstəxanaya və ya evə göndərmək lazımdır. Əlbəttə ki, mümkünsə, sinifdə uşaqlar arasında məsafəni artırmağa dəyər. Həmçinin havalar soyuq olsa belə, sinif otaqlarının tez-tez havalandırılması vacibdir”.

Aytən Məftun