Zehni gücləndirən qidalar - Həkim açıqladı

Beynin işi təbii ki, insanın qida rasionunun keyfiyyətindən asılıdır: biz daha çox göyərti və meyvə yeyəndə, qızardılmış yeməklərdən daha çox buxarda hazırlanmış qidalara üstünlük verəndə orqanizmin gəncliyini uzadıb, daha yaxşı düşünməyə başlayırıq. Bununla belə, zehni fəaliyyət üçün xüsusilə faydalı olan məhsulların siyahısı var.

Publika.az xəbər verir ki, bu sözləri həkim-endokrinoloq Zöhrə Pavlova deyib. Həkim birinci yeri qaynadılmış toyuq ətinə verib və qeyd edib ki, onun tərkibində təkcə zülallar deyil, həm də serotonin istehsalını təşviq edən və sinir liflərinin fəaliyyətini yaxşılaşdıran triptofan var. Toyuq əti axşam, nahar, hətta səhər yeməyində (tərəvəzli toyuqlu sendviç) yeyilə bilər.

Beyin üçün başqa bir faydalı qida skumbriya, siyənək və ya qızılbalıq kimi yağlı balıqlardır. Bu balıqları qaynadılmış və ya bişmiş şəkildə yemək məsləhət görülür, ancaq onları turşu da edə bilərsiniz. Belə balıq omeqa-3 və omeqa-6, beyin fəaliyyəti üçün əvəzolunmaz yağ turşularının tədarükçüsüdür.

Siyahıya təzə və ya dondurulmuş yaşıl noxud da daxildir. Tərkibində yaddaşımızı yaxşılaşdıran çoxlu tiamin var. Həkim bu tərkibi bişmiş yumurta və ya salatlara əlavə etməyi, həm də qarnir kimi istifadə etməyi tövsiyə edir. Salatlara gəldikdə, onlara balqabaq toxumu əlavə edin. Balqabaq toxumu A, E vitaminlərinin, həmçinin omeqa-3 və omeqa-6 yağ turşularının mənbəyidir.

"Siyahıda dəniz yosunu da var. Bəli, həvəskar məhsuldur, hər gün yeməyəcəksiniz. Amma yodun əsas tədarükçüsü olaraq, həm zehni, həm də fiziki fəaliyyətdən asılı olan qalxanabənzər vəzinin sağlamlığı üçün çox vacibdir", - endokrinoloq teleqram kanalında yazıb.

Aytən Məftun