ÜST-dən “Ebola” virusu ilə bağlı xəbərdarlıq - Vəziyyət ağırlaşır

Konqo Demokratik Respublikasında “Ebola” virusuna yoluxma şübhəlisi ilə bağlı halların sayı 900-ü ötüb.

Publika.az xəbər verir ki, bu barədə Ümumdünya Səhiyyə Təşkilatının baş direktoru Tedros Adhanom Qebreyesus sosial şəbəkə hesabında paylaşım edib.

O bildirib ki, ölkədə 900-dən çox şübhəli yoluxma halı müəyyən olunub, onlardan 101-i laborator şəkildə təsdiqlənib.

Onun sözlərinə görə, epidemiyanın əsas ocağı sayılan İturi əyalətində təhlükəsizlik problemi vəziyyəti daha da çətinləşdirir. Zorakılıq və məcburi köçkünlük səbəbindən təmasların izlənməsi və yoluxmaların erkən aşkarlanması ciddi şəkildə məhdudlaşıb. ÜST rəhbəri vəziyyəti mürəkkəbləşdirən əsas amillərdən birinin virusun nadir variantının yayılması olduğunu vurğulayıb. Hazırda həmin varianta qarşı təsdiqlənmiş peyvənd və ya spesifik müalicə mövcud deyil.

Xatırladaq ki, mayın 17-də ÜST Konqo Demokratik Respublikası və Uqandada “Ebola” epidemiyası ilə bağlı fövqəladə vəziyyət elan edib. Mayın 22-də isə təşkilat Konqoda risk səviyyəsini “yüksək”dən “çox yüksək”ə qaldırıb.