Göyçay çayında müvəqqəti alternativ yolun inşasına başlanılıb - VİDEO

Yolun salınmasına sel sularının səviyyəsi aşağı düşən kimi başlanılacaq. Müvəqqəti yol mövcud körpüdən təqribən 200 metr aralıda salınacaq.

Bu barədə Publika.az-a Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli məlumat verib. O bildirib ki, iyunun 3-də Agentlik əməkdaşları ərazidə hərəkətin bərpa edilməsi üçün işlərə başlayıblar:

"Azərbaycan Avtomobil Yolları Dövlət Agentliyinin və “Körpübinatikinti” ASC-nin tikinti briqadaları və ağır texnikaları əraziyə cəlb olunub. Hazırda ərazidə çaya qədər olan yolun avtoqreyderlə düzləşdirilməsi və çayda suyun kənardan mərkəzə yönəldilməsi üçün axın istiqamətinin dəyişdirilməsi tədbirləri görülür. Çay məcrasına dəmir-beton borular qoyularaq üzərində müvəqqəti yol salınacaq və avtonəqliyyat vasitələrinin hərəkəti bərpa olunacaq. Sel sularının kəsildiyi andan bu işlərin bir həftə ərzində tam olaraq yekunlaşdırılması nəzərdə tutulub. Bu müddət ərzində sürücülər Göyçay-Ucar yolundan istifadə etməklə rayon mərkəzinə gedə bilərlər".

Qurum rəsmisi bildirib ki, əhalinin Göyçay çayı üzərindən piyada keçidinin təmin olunması üçün şəhərin şimalındakı köhnə asma körpüdə agentlik əməkdaşları tərəfindən təmir-bərpa işləri aparılıb və orada insanların təhlükəsiz hərəkəti üçün şərait yaradılıb:

"Müvəqqəti yolun salınması ilə paralel olaraq yaxın müddət ərzində mövcud körpünün bərpasına da başlanılacaq. Bunun üçün körpünün yuxarı hissəsində sol tərəfindəki çaysahili torpaq qatının selin təsiri nəticəsində dağılmasının qarşısının alınması üçün suistiqamətləndirici beton bəndin tikilməsinə başlanılır. Artıq bunun üçün ərazidə hazırlıq və mobilizasiya işləri aparılır"

A.Nəcəfli onu da qeyd edib ki, sel suları ümumilikdə körpüyə deyil onun bəndlərinə ziyan vurub:

"Körpünün dayaqları yerindədir. Amma güclü sel suları sahil-mühafizə bəndini dağıdıb. Körpünün kənarındakı sutənzimləyici qurğunun dağıdılması isə çayın məcrasının genişlənməsinə və üstündə olan yolun yararsız hala düşməsinə səbəb olub. Yararsız hala düşən hissə isə yanaşma yolu hesab edilir. Ona görə də ehtimal odur ki, əvvəlki körpünün bərpası kifayət edəıcək. Ərazidə yeni yeni körpü tikilməyəcək".

Xatırladaq ki, iyun ayının 2-də axşam saatlarında sel suları nəticəsində Bakı-Şamaxı-Yevlax avtomobil yolunun Göyçay çayı üzərində yerləşən, yanaşma yolları ilə bərabər 76.6 metr uzunluğa malik avtomobil körpüsünün sol yanaşma yolunun bir hissəsi uçub.

Sel suları sutənzimləyici qurğunu yuması nəticəsində su yanaşma yolunun torpaq yatağına daxil olub. Nəticədə yolun torpaq yatağı yuyulub və körpüyə yanaşma yolunda uçqun baş verib. Uçmuş yol hissəsinin uzunluğu təqribən 25 metr, hündürlüyü isə 12.5 metr təşkil edir.

Kənar dayaq svay özülündə yuyulma prosesi getsə də, körpünün konstruksiyası olduğu kimi qalıb, yəni dayaqlarda çökmə prosesi getməyib.

Könül