Şahnaz Bəylərqızı ilə bağlı məhkəməyə müraciət olunacaq - AÇIQLAMA

Jurnalist Şahnaz Bəylərqızının barəsində seçilmiş həbs qətimkan tədbirinin ev dustaqlığı ilə əvəz olunması üçün məhkəməyə müraciət olunması nəzərdə tutulub.

Publika.az xəbər verir ki, bu barədə Teleqraf-a jurnalistin vəkili Bəxtiyar Hacıyev bildirib.

Onun sözlərinə görə, müvəkkilinin barəsində seçilmiş həbs qətimkan tədbirinin ev dustaqlığı ilə əvəz olunması haqda fevralın 17-də Xətai Rayon Məhkəməsinə vəsatət verəcəklər.

Qeyd edək ki, bu il fevralın 6-da Xətai Rayon Məhkəməsinin qərarı ilə jurnalistin barəsində 3 ay 15 gün müddətinə həbs qətimkan tədbiri seçilib. Onun barəsində "Toplum TV işi" üzrə cinayət işi başlanıb.

Bakı Apellyasiya Məhkəməsi isə həbs qətimkan tədbirinin ləğv olunması üçün verilən şikayəti təmin etməyib.

Şahnaz Bəylərqızı Toplum TV-nin əməkdaşı olub. O, fevralın 5-də həbs edilib.

Xatırladaq ki, 2024-cü il martın 6-da sosial şəbəkələrdə Toplum TV-nin ofisində axtarış aparılması, saxlanılanların olması ilə bağlı xəbərlər yayılıb. Daxili İşlər Nazirliyinin mətbuat xidmətinin yaydığı məlumata görə, paytaxtın Nərimanov rayonu Y.V.Çəmənzəminli ev 98 B ünvanında yerləşən ofisdə və əlavə digər ünvanlarda bir qrup şəxsin fəaliyyəti ilə bağlı daxil olan məlumat üzrə polis əməkdaşları əməliyyat-axtarış tədbirləri keçiriblər.

Akif Qurbanov, Ramil Babayev, Əli Zeynalov, Müşfiq Cabbarov, İlkin Əmrahov, Ruslan İzzətli və Ələsgər Məmmədli həbs ediliblər.

Adları qeyd olunan şəxslərə qarşı Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.

Akif Qurbanov, Ramil Babayev, Əli Zeynalov, Müşfiq Cabbarov, İlkin Əmrahov, Ruslan İzzətli və Ələsgər Məmmədli barəsində həbs müddəti Xətai Rayon Məhkəməsinin qərarı ilə 6 aprel 2025-ci il tarixinədək uzadılıb.