İrəvandan müharibə anonsu: Növbəti savaşa hazır olun, təəssüf ki, olacaq - Video

10:30

"Ermənistan Rusiya ilə Avropa İttifaqı arasında ziddiyyətlər üzərində oynayır və bu, öz maraqları üçün təhlükəlidir".

Publika.az xəbər verir ki, bunu Ermənistanın xarici işlər nazirinin keçmiş müavini Artak Apitonyan “Sputnik Ermənistan”a Avropa monitorinq missiyasının gəlişi və rusiyalı tərəfdaşlarla polemika kontekstində İrəvanın siyasətini şərh edərkən deyib.

O hesab edir ki, Ermənistan Qərb və Rusiya vektorlarını birləşdirməyə deyil, əksinə, onlara qarşı durmağa çalışaraq təhlükəli yola qədəm qoyub.

Fevralın 20-də Ermənistanda iki illik mandatla 100 nəfərdən ibarət yeni Avropa missiyası yerləşdirilib. Missiya mülki elan edilsə də, onun tərkibində 50 nəfər silahlı jandarm var. Missiyanın məqsədi Ermənistanın sərhədyanı ərazilərində sabitliyi təşviq etmək, yerlərdə etimad yaratmaq və Ermənistanla Azərbaycan arasında münasibətlərin normallaşdırılması səyləri üçün əlverişli mühiti təmin etməkdir.

Ermənistan cəmiyyətini narahat edən isə silahlı qüvvələrin - jandarmlar və polislərin ölkəyə gəlməsidir.

Həmçinin Aİ missiyası Rusiyada bir çox sualları, o cümlədən onun mandatı, funksiyaları, müddəti və Bakı ilə İrəvan arasında münasibətlərin normallaşdırılması səylərinə gətirə biləcəyi əlavə dəyərlə bağlı suallar doğurur.

"Vaxtilə biz komplementarizmə sadiq qaldıq. Biz başa düşdük ki, qlobal güc mərkəzlərinin regionda öz maraqları var. Ermənistan bir tərəfdən Rusiya ilə müttəfiqlik münasibətlərini inkişaf etdirdi, digər tərəfdən Avropa İttifaqı ilə əməkdaşlığı gücləndirdi, müqavilə imzaladı, razılaşmalar və s. Və biz onların antaqonizmi deyil, bu maraqların birləşməsi üzərində işləmişik, amma bu gün nələr edilir. İlk növbədə regionlardakı ölkələr böyük aktorların maraqlarının toqquşmasından əziyyət çəkirlər”, - deyə Apitonyan bildirib.

Ekspert qeyd edib ki, hazırda problem erməni tərəfinin Moskva ilə Qərb paytaxtları arasındakı ziddiyyətlərdən istifadə etməyə çalışmasındadır. Əlavə edib ki, artıq ziddiyyətlər Ermənistanın özünə qarşı işləməyə başlayır.

Apitonyan hesab edir ki, Ermənistan Rusiya ilə müttəfiqlik münasibətlərinin bütün potensialından, demək olar ki, heç vaxt tam istifadə etməyib. O, xəyali xarici siyasət balansını saxlamaq üçün bəzən öz maraqlarını qurban verən Ermənistanın utancaq siyasət yürütdüyünü söyləyib.

Sabiq nazir müavininin fikrincə, Ermənistanın xarici siyasətində iddialılıq və cəsarət yoxdur:

"Əgər tərəfdaşlar bizə güvənirlərsə, bizə rəğbət bəsləyirlərsə, o zaman biz bu lütfdən sorğu mövqelərimizi artırmaq üçün istifadə etməliyik və əlimizdə olanlarla məhdudlaşmamalıyıq. Biz proqnozlaşdırıla bilən, eyni zamanda qətiyyətli olmalıyıq".

Erməni siyasətçi hesab edir ki, bu gün Ermənistanın ətrafında təhlükəsizlik mühitinin yaxşılaşdırılması təkcə mahir diplomatiya və yumşaq güc deyil, həm də sərt güc tələb edir: "Daxili təşkilatlanma lazımdır və Ermənistanda cəmiyyət ölkənin müharibə vəziyyətində olduğunu hiss etməli və hər bir proses bu məntiqə tabe olmalıdır".

Apitonyan müharibə proqnozu da verib:

"Biz növbəti müharibəyə hazırlaşmalıyıq. Bu, təssüf ki, olacaq, buna demək olar ki, heç bir şübhəm yoxdur. Cəmiyyətimiz yuxusuzluq vəziyyətindədir və bu vəziyyətdən mütləq çıxmalıdır. Mən razıyam ki, bu, daimi gərgin və daimi stress vəziyyətində qüvvə və resursların səfərbər edilməsi həmişə daha yaxşı və daha sürətli olur. Təbii ki, müdafiə qabiliyyətimizi gücləndirmək üçün nələrsə edilir, lakin bu kifayət deyil. İctimai səfərbərlik lazımdır, müdafiə strategiyasına yenidən baxılması lazımdır".

Sabiq diplomat Rusiya istiqamətindən əlavə, müdafiə sistemini gücləndirmək üçün İranla qarşılıqlı fəaliyyətə diqqət çəkib.

"44 günlük müharibə başa çatdıqdan dərhal sonra Ermənistanın İranla hərbi-siyasi əməkdaşlığı intensivləşdirmək imkanı var idi. Sonra vəziyyət başqa cür dəyişdi. Həm də nəzərə alsaq ki, Türkiyə indi öz daxili problemləri ilə məşğuldur, Ermənistan regional siyasətində müəyyən korrektələr edə bilər. Siyasət mövcud imkanlardan istifadə etmək və yeni imkanlar yaratmaqdır", - ekspert qeyd edib.

Akqabay