İran rəqs edən robot hazırladı - FOTO

İran istehsalı ilk insan robotu olan “Surena”nın yeni versiyasi “Surena III” robotu hazırlanıb.

Publika.az “Fars” agentliyinə istinadən xəbər verir ki, “Surena III” əvvəlki “Surena I” və “Surena II” versiyalarından daha çox əməliyyat həyata keçirə bilir.

Ölkənin qabaqcıl universiteti olan Tehran Universitetinin alimləri tərəfindən “Surena”nın ilk versiyası 2008-ci ildə hazırlanıb. İran hazırda dünyada insan robot hazırlayan 5 ölkədən biridir.

“Surena I” yalnız ona verilən mətndəki məlumatları oxuya bilir və uzaqdan verilən komanda ilə idarə olunurdu. 2010-cu ildə hazırlanan “Surena II” isə hərəkət edə və 22 dərəcə dönə bilirdi. Ancaq robot istehsalçıları “Surena II” versiyasını gerçək bir robot olaraq xarakterizə etmədilər, çünki robotda senzorlar yox idi.

“Surena III” isə rəqs edə və 31 dərəcə çevrilə bilir. Sonuncu versiya “Surena II” ilə müqayisədə daha sürətli hərəkət edir. “Surena III” saatda 3 kilometr sürətlə hərəkət edir. Bundan başqa, fars dilində 200 sözü qəbul edə bilən və öz-özünə danışan “Surena III” senzorlara da sahibdir.