Qafqaz Universitetində “CEO SUMMİT 2015” proqramı keçirilib

Qafqaz Universiteti Texnoparkının İnkubasiya Mərkəzində fəaliyyət göstərən “Business Talk” şirkəti tərəfindən “CEO SUMMİT 2015” proqramı baş tutub.

Publika.az xəbər verir ki, əsas mövzusu iş həyatı, karyera, qlobal şirkətlərdə idarəçilik, fərdi inkişaf olan proqramda Azərbaycan və Türkiyə, həmçinin qlobal şirkətlərdə fəaliyyət göstərən altı iş adamı təcrübələrini və fikirlərini iştirakçılarla bölüşüb.

Azərbaycan Universitetinin rektoru Fərid Əhmədov “İş həyatında təhsilli insan, yoxsa əxlaqlı insan?”, “P&G” şirkətinin Azərbaycan və Gürcüstan üzrə direktoru Taygun Günay “Qlobal markalarda idarəçi olmaq”, MADO Azərbaycan şirkətinin təsisçi ortağı və direktoru Kamran Məşədiyev “Uğurlu biznesin təməlləri”, “Koç Sistem” şirkətinin Azərbaycan üzrə direktoru Ali B. Kutvan “Şirkətlərdə Strateji İdarəetmə”, “Mc Donalds” şirkətinin İngiltərə və Türkiyə üzrə direktoru Ahmet Murtezaoğlu “Markaları marka edən loqoları deyil, içindəki insanlardır”, “Scentling” Şirkətinin Azərbaycan, Gürcüstan və İndoneziya üzrə rəhbəri Bəhruz Babayev “Qlobal biznes əlaqələri” mövzusunda çıxış ediblər.

Auditoriyanın suallarını cavablandıran spikerlər geniş həyat təcrübələrindən, mümkün maneələr və onların həll yollarından bəhs edərək, iştirakçıları maraqlandıran mövzulardan danışıblar.

Xatırladaq ki, “CEO SUMMİT 2015” proqramının əsas dəstəkçisi Qafqaz Universiteti Texnoparkıdır. Texnoparkın könüllüləri layihə rəhbəri Eyyub Hüseynzadənin təlimatları ilə tədbirin təşkilatçılığında yaxından iştirak ediblər.
Qafqaz Universitetinin prorektoru, professor Cihan Bulut sammitin önəmli olduğunu bildirib: “Burada iştirak edən tanınmış iş adamları öz sahələrində əldə etdikləri təcrübəni paylaşacaqlar. Qonaqlarımıza iştirak etdikləri üçün universitetimiz adından təşəkkür edirəm”.

Daha sonra çıxış edən “Business Talk” təşkilatının təsisçisi və rəhbəri Əyyub Hüseynzadə qeyd edib ki, bu tədbirin təşkil edilməsində əsas məqsəd bilgi və təcrübənin paylaşılmasıdır:

“Sammitin keçirilməsində məqsədimiz uğurlu biznes sahiblərinin bilgilərini bizimlə paylaşmasıdır. Bu gün burada iştirak edən tanınmış iş adamlarına təşəkkür edirik ki, bizim təkliflərimizi qəbul edib dəyərli vaxtlarını gəncləri maarifləndirmək üçün sərf edirlər”, - deyə o bildirib.