“Android”dən xəbərdarlıq: “Antiviruslar lazımsızdır”

“Android” əməliyyat sisteminin təhlükəsizlik üzrə direktoru Adrian Lüdviq “Android” ekosisteminin təhlükəsizliyi, virus və antivirus proqramları ilə bağlı fikrini bildirib.

Axar.az xəbər verir ki, şirkətin təhlükəsizlik direktorunun sözlərinə görə, əksər şirkətlərin xəbərdarlığına baxmayaraq, “Android” istifadəçilərinin smartfon və planşetlərdə antivirus proqram təminatı və ya digər informasiya təhlükəsizliyi alətləri quraşdırmasına ehtiyac yoxdur.

A.Lüdviq hesab edir ki, bu proqramlar istifadəçilərin 99 faizi üçün faydasızdır:

“Güman edirəm ki, mühafizəni heç vaxt təmin edə bilməyəcək məhsula pul xərcləmək riskin səmərəsiz şəkildə azaldılmasıdır. Əslində, əlavələrin hamısı dərc olunmazdan əvvəl avtomatik yoxlanışdan keçir. İstifadəçinin rəsmi kataloqdan potensial zərərli əlavə yükləməsi riski çox şişirdilib. Bu hadisənin baş verməsinin mümkünlüyü çox aşağıdır”.

Mütəxəssis antivirus şirkətlərini minlərlə virus və zərərli əlavələrlə bağlı hesabatları düzgün şərh etməməkdə günahlandırıb. Onun sözlərinə görə, antivirus şirkətləri nə qədər qurğunun virusa yoluxması barədə məlumat vermədən zərərli əlavələrin sayını açıqlamağa üstünlük verir. Çünki rəqəmlər daima artdığından bu onlara məhsullarını satmaq üçün sərf edir.