“iPhone” xalq düşməni elan edildi

Çində maraqlı bir hesabat açıqlanıb.

ANS PRESS-in məlumatına görə, Çinin ən böyük yayım şirkətlərindən biri olan "CCTV" açıqladığı hesabatda “iPhone”un ölkənin milli təhlükəsizliyi üçün qorxulu olduğunu bildirib və bir növ "xalq düşməni" elan edib. Bunun səbəbi isə “iPhone”larda olan "Frequent Locations" funksiyasıdır.

Bu funksiya, "iPhone" istifadəçilərinin ən çox olduqları yerləri yazır və haraların sizin üçün əhəmiyyətli olduğunu göstərir. Məsələn tez-tez getdiyiniz bir məkanı yaddaşıda saxlayan cihaz, həftəsonları tez-tez getdiyiniz bu məkanı vaxtı gəldiyində sizə xatırladır və "x saatda bu dükanda olmalısınız" kimi bir tövsiyə edir. Bunu da daha əvvəlki təcrübələrinə əsaslanaraq, yəni istifadəçi qeydlərini araşdıraraq həyata keçirir.

Beləliklə Çinin narahatlığı da bu funksiya vasitəsilə bütün Çin xalqının hər hərəkətinin qeyd edilməsi şübhəsidir.

"Apple" hər nə qədər istifadəçinin məlumatı olmadan bütün qeydlərin telefonda qalacağını söyləsə də, xüsusilə ABŞ Milli Təhlükəsizlik İdarəsi (NSA) qalmaqalından sonra Çinin bu məsələdə narahat olması təəccüblü deyil.