“Euronews” telekanalı “BakuTel-2014” sərgisindən reportaj verib

“Euronews” telekanalında “BakuTel-2014” XX Azərbaycan Beynəlxalq telekommunikasiya və informasiya texnologiyaları sərgisi ilə bağlı reportaj və Prezident İlham Əliyevin kanala verdiyi müsahibə yayımlanıb.

Reportajda bildirilir ki, “BakuTel” sərgisi keçirildiyi vaxtdan Bakı dünyanın ən müasir texnologiyalar və tədqiqatlar paytaxtına çevrilib. Sərgidə kompyuterlərin, mobil telefonların ən yeni modellərinin, peyk telekommunikasiyaları sahəsində innovasiyaların nümayiş etdirildiyi diqqətə çatdırılır.

Azərbaycanın öz kosmik sənayesini inkişaf etdirdiyi bildirilən reportajda dörd il əvvəl ölkəmizin Milli Peyk Operatoru “Azərkosmos” Açıq Səhmdar Cəmiyyətinin yaradıldığı, ötən il “Azərspace-1” telekommunikasiya peykinin orbitə buraxıldığı, bu yaxınlarda isə cəmiyyətin Fransanın “Airbus Defence and Space” şirkəti ilə müqavilə imzaladığı qeyd edilir. Hər iki şirkətin ikinci peyk - “Azərsky”ın istifadəsi məqsədilə öz səylərini birləşdirdiyi diqqətə çatdırılır. Reportajda Azərbaycan Prezidenti İlham Əliyevin bununla bağlı fikirləri də yer alıb. Dövlət başçısı bu müqavilənin kosmik sənayenin inkişafı baxımından ölkəmiz üçün həm texnologiyalar, həm də elm və biznesin inkişafı, eləcə də təhsil sistemi üçün geniş imkanlar açdığını vurğulayır. Azərbaycan Prezidenti yeni peykin bizə kənd təsərrüfatı, fövqəladə hallar sahəsində həyatımızın müxtəlif sahələrindəki imkanlarımızı daha ətraflı qiymətləndirməyə imkan verəcəyini qeyd edir.

“Evronews”un videomaterialında o da diqqətə çatdırılır ki, “Azərsky” artıq kosmosdadır. Peyk ən müasir avadanlıqla təchiz edilib və bu da yer kürəsinə bütün vacib məlumatları ötürmək imkanı yaradır. Süjetdə “Airbus Defence and Space” şirkətinin təmsilçisi Bruno Bertolini deyir ki, kosmosdan çəkilən şəkillər Xəzər regionunda yerləşən xeyli sayda şirkət və təşkilatlar tərəfindən gündəlik istifadə ediləcək. Onlar ilk növbədə kartoqraflara, ekoloqlara lazım olacaq, neftçilərə, riskləri təhlil edənlərə kömək edəcək, proqnozları verənlərə faydalı olacaq. Bir sözlə, peyk vasitəsilə çəkilən fotoşəkillər kosmosdan coğrafiya ilə bağlı daha dəqiq məlumatları ötürəcək.

Reportajda “BakuTel 2014”də 23 ölkəni təmsil edən 250 şirkətin telekommunikasiya bazarının peşəkarlarının iştirak etdiyi qeyd olunur. Diqqətə çatdırılır ki, burada gənc sahibkarların, təşkilatçıların bir araya gəldiyi “Hi-Tech Park” ideyalar inkubatoru da var.

“Euronews” kanalında sərgi ilə bağlı yayımlanan bu süjet informasiya-kommunikasiya texnologiyaları üzrə əldə edilən nailiyyətlərin və dünyada tətbiq olunan qabaqcıl yeniliklərin nümayişi ilə yanaşı, bir daha “BakuTel” sərgi-konfransının artıq geniş miqyasda nüfuza malik olduğunu göstərir.