Amerika mütəxəssisləri super-robotlar yaradıblar - FOTO

Yaponiyada Fukusima-1 AES-də baş vermiş partlayışdan sonra Amerika alimləri təhlükəli zonalarda əməliyyatlar apara biləcək çoxfunksiyalı robotlar yaratmaq qərarına gəliblər.

Publika.az xəbər verir ki, robotlar əsasən xilasetmə-axtarış, kəşfiyyat əməliyyatları və başqa əməliyyatlarda istifadə ediləcəklər.

Reaktiv hərəkət laboratoriyasının (NASA) və “DARPA” müdafiə elmi-tədqiqat agentliyinin aparıcı mütəxəssisləri iki robot – “RoboSimian” və “Surrogate” robotlarını layihələşdirib və quraşdırıblar. Bu robotları “2015 DARPA Robotics Challenge Finals” müsabiqəsində təqdim etmək planlaşdırılır.

“Surrogate” robotu insana daha çox bənzəyir. Onun hündürlüyü 1,4 metr, çəkisi 90,7 kiloqramdır. Bu robot müxtəlif obyektləri tuta bilir. Onun elastik kürəyi müxtəlif manevrlər və hərəkətlər etməyə imkan verir. Lakin bu robot üçün pillələri qalxmaq hələlik çətindir. “RoboSimian” robotu dördayaqlı hörümçəyə bənzəyir. O, hər cür maneələri əla keçir və demək olar ki, hər cür səthi qalxa bilir.