“Facebook” “Microsoft Bing” axtarış sistemini dayandırdı

Dünyanın ən böyük sosial şəbəkəsi olan “Facebook” öz saytında “Microsoft Bing” axtarış sistemindən istifadəni dayandırıb.

Publika.az xəbər verir ki, bu barədə “Facebook” nümayəndələrinə istinadən “Reuters” agentliyi məlumat yayıb.

“Facebook”da indiyə qədər iki axtarış sistemi işləyib. Veb-məzmun üzrə axtarış “Bing” sisteminə əsaslanıb, “sosial axtarış” isə “Facebook Graph Search” sisteminin hesabına işləyib.

Ancaq hazırda “Facebook” saytda axtarış funksiyasının reallaşdırılması üzrə yanaşmasına yenidən baxıb.

"Biz hazırda “Facebook” axtarış sistemində edilmiş sorğular əsasında veb-məzmun üzrə axtarış nəticələrini göstərmirik, çünki əsas məqsədimiz insanlara sosial şəbəkədə mübadilə edilən informasiyanı tapmaqda kömək etməkdir. Biz “Microsoft”la bir çox sahələrdə əməkdaşlığa davam edəcəyik" – sosial şəbəkənin nümayəndəsi deyib. “Microsoft” bu informasiyanı şərh etverməyib.

“Statcounter” xidmətinin məlumatına görə, “Bing” populyarlığına görə dünyanın ikinci axtarış sistemidir. Ancaq 4,4 faiz bazar payına malik “Microsoft”un axtarış sistemi “Google”dan çox geri qalıb.