Rusiya orbitə rəsədxana göndərir

Rusiya yeni kosmik “Millimetron” rəsədxanasını 2025-ci ildə orbitə göndərməyi planlaşdırır.

Axar.az xəbər verir ki, bu qurğu kainatda cərəyan edən proseslər haqqında yeni məlumatlar toplamağa, qara dəliyin daxilində nə baş verdiyini anlamağa, eləcə də “qara enerjinin” mənşəyi haqqındakı məlumatları dəqiqləşdirməyə kömək edəcək.

“Millimetron” layihəsi federal kosmik proqrama daxildir. O, Rusiya Elmlər Akademiyası Lebedev adına Fizika İnstitutunun Astrokosmik mərkəzi tərəfindən “Radioastron” layihəsinin davam və inkişafı kimi təklif edilib. Qeyd edək ki, “Radioastron” – dünyada ən iri kosmik radioteleskopdur. O, hazırda 40-a yaxın rus və xarici yerüstü radioteleskoplarla birlikdə orbitdə uğurla fəaliyyət göstərir.

Gələcək “Millimetron” rəsədxanası “Radioastron”dan fərqli olaraq başqa uzunluq diapazonunda işləyəcək – 0,3-17 millimetr arasında. Gözlənilir ki, “Millimetron” qara dəliyin hüdudlarına daha yaxın məsafədən nəzər salmağa, oradakı prosesləri tədqiq etməyə, ulduzların və ekzoplanetlərin yaranmasını görməyə və yadda saxlamağa imkan verəcək.