Çin robot bazarına çevrilib

Çin bu il təsərrüfat robotları bazarında Yaponiyanı geridə qoyaraq dünya üzrə birinci yerə çıxıb.

2014-cü ilin sonuna olan məlumata görə, Çin müəssisələrində 200 minə qədər robotdan istifadə edilirdi. Keçən il ölkədə 32 min robot istehsal olunub. Bu da dünya üzrə istehsal olunan robotların 20 faizinə bərabərdir.

Buna baxmayaraq, Çində işləyən insanlarla robotların nisbəti aşağı səviyyədə qalır. Ölkədə 10 min işləyən insana cəmi 30 robot düşüb. Halbuki bu göstərici Yaponiyada 330 robota çatır.

Ümumilikdə Çinin robot bazarı əsasən dörd transmilli korporasiyanı – İsveçrənin ABB Group, Yaponiyanın Fanuc Corp və Yaskawa Electric Corp, həmçinin Almaniyanın Kuka Robotics şirkətlərini məhsulla təmin edir. Bazarın 58 faizi məhz bu şirkətlərin payına düşür.

Çinin məişət texnikası istehsalçısı Midea şirkəti 2011-ci ildən Çin fabriklərinin robotlaşma və avtomatlaşmaya keçidinin flaqmanına çevrilib. 2011-2014-cü illərdə Midea bu sektora 800 milyon yuan (128 milyon dollar) xərcləyib və 2015-ci ildə daha 900 milyon yuan yatırmaqla 600 robotu istismara cəlb etməyi planlaşdırıb. Bununla da kompaniya 2015-ci ilin sonunadək 30 min işçidən 6 minini, 2018-ci ilə qədər isə daha 4 min işçini ixtisar etməyi düşünür.