Yeni nəsil şəxsiyyət vəsiqələri bu tarixdən veriləcək – PARLAMENT TƏSDİQLƏDİ

29 İyun 2018 13:56 (UTC+04:00)

Azərbaycan vətəndaşlarının yeni nəsil şəxsiyyət vəsiqəsi ilə təmin edilməsi ilə əlaqədar bəzi qanunlarda dəyişikliklər təsdiqlənib.

Publika.az xəbər verir ki, bu barədə millət vəkili Əli Hüseynli məlumat verib. Millət vəkili bildirib ki, bu ilin sentyabr ayından əhaliyə yeni nəsil şəxsiyyət vəsiqələri veriləcək:

“Bu qanunun qüvvəyə minməsi tarixini bir neçə dəfə dəyişmişik. Bunun da səbəbləri bəlli idi. Biometik şəxsiyyət vəsiqələrinin verilməsi üçün müəyyən avadanlıqların alınmasına görə bu məsələ gecikirdi. Daxili İşlər Nazirliyindən əldə etdiyim məlumata görə, artıq bu avadanlıqlar ölkəyə gətirilib. Bakı və Naxçıvan daxil olmaqla 10 regionda bu avadanlıq quraşdırılıb. Bakı və Gəncədəki iki “ASAN” xidmət mərkəzi və sentyabr ayının 1-dən Azərbaycan vətəndaşları yeni nəsil şəxsiyyət vəsiqəsi ilə təmin ediləcək”.

Qanun layihəsi səsə qoyularaq qəbul edilib. Yeni nəsil şəxsiyyət vəsiqəsinin tətbiqi müddətləri ilə əlaqədar bəzi qanunlarda dəyişiklik edilib. Həmin qanunların bəzi müddəaları gələn ilin yanvarın 1-dən qüvvəyə minəcək.

Gülxar