Mübariz Tağıyev: “Bu hadisə ölkəmizin tarixinə qızıl hərflərlə yazılacaq”

Xalq artisti Mubariz Tağıyev Avropa Oyunlarını tarixi hadisə kimi qiymətləndirib.

Sənətçi təəssüratlarını Publika.az-la bölüşüb: “Avropa Oyunlarının ölkəmizdə ilk dəfə olaraq keçirilməsi tarixi bir hadisədir. Bu hadisə ölkəmizin tarixinə qızıl hərflərlə yazılacaq. Bütün Avropa Azərbaycanın qonağı olacaq. 50-dən artıq ölkənin 6 mindən artıq idmançısı ölkəmizə təşrif buyuracaq. Azərbaycan bu oyunlara tam hazırdır. Ölkə prezidentinin səyi nəticəsində yeni quruculuq işləri görülüb, idman kompleksləri tikilib. Bu inkişaf, quruculuq, abadlıq yalnız paytaxtda deyil, eyni zamanda bölgələrdə də davam etdirilib. İstər Mingəçevir olsun, istər Şamaxı, Göyçay, Bərdə… Hansı birini deyim.

Əcnəbi turistlər ölkəmizi görüb valeh olacaqlar”.

Özünün də idmana böyük maraq göstərdiyini deyən xalq artisti oyunları yaxından izləcəyək: “Mən də cavanlıqda idmanla məşğul olmuşam və özümü həm də idmançı sayıram. İdman sağlam bədəndə sağlam ruh deməkdir. Ölkəmizdə keçirilən bu oyunlar insanların idmana marağını daha da artıracaq”.

Cəvahir Səlimqızı