Ağdaşda məşəl estafeti, Mingəçevirdə alov festivalı

Şəhər və rayonlarımızı dolaşan I Avropa Oyunlarının məşəlinin növbəti məkanı Ağdaşdır.

Publika.az xəbər verir ki, 105500 nəfər əhalisi olan bölgədə ənənəyə uyğun olaraq məşəl estafeti olacaq. Məşəl estafeti bu gün 14:00-da baş tutacaq. Qarşılama mərasimi saat 15:00-da Heydər Əliyev meydanında, tədbirin yekunlaşdırılması isə saat 15:30-da olacaq.

Məşəl estafeti daha sonra Azərbaycanın dördüncü ən böyük şəhəri olan Mingəçevirdə davam edəcək. 100600 nəfərlik əhalisi olan bölgədə 19:20-də məşəl estafeti, 20:20-də Heydər Əliyev meydanında alov festivalı baş tutacaq. Tədbirin yekunlaşdırılması isə saat 21:40-da olacaq.

Qeyd edək ki, I Avropa Oyunlarının məşəli 47 gün ərzində Azərbaycanın hər bir guşəsini gəzib dolaşacaq və açılış mərasimində Bakı “Olimpiya” stadionuna gətiriləcək. Estafetə 1000 nəfərdən çox məşəlçi cəlb olunub və hər regionda “Alov festivalı”nın keçirilməsi nəzərdə tutulub. Məşəl yer üstündə avtobus, funikulyor, velosiped, yer altında Bakı metrosu, suda qayıq, havada isə təyyarə ilə daşınacaq. Məşəl iyunun 8-də paytaxtdakı idman arenalarında, 9-da isə İçərişəhərdə gəzdiriləcək.

10 iyun məşəl proqramının son günü olacaq və Bakıya gətirilənədək təxminən 5500 kilometr məsafə qət edəcək. 660 millimetr hündürlüyü olan məşəlin gövdəsi “Bakı 2015” brendində yer alan nar ağacını xatırladır. Alovu qoruyan mis başlıq da nar formasındadır. Onun 50 çəyirdəyi Oyunlarda iştirak edən ölkələrin sayını təmsil edir.

Aygün İlqarqızı