Özünü “Mehdi” sayan Gülən “Uzun Cevdeti” döydü, Hakan Şükürə...

Vaxtilə Fətullah Gülənin yanında olan, lakin “17 dekabr” hadisələrindən sonra camaatı tərk edən “Zaman” qəzetinin keçmiş şef-redaktoru, köşə yazarı Hüseyn Gülərcə dini xadim kimi təqdim olunan F. Gülənin əslində necə olduğu haqda danışıb.

Publika.az xəbər verir ki, H. Gülərcə Gülənin “Zaman” qəzetinin sahibi olduğunu və vaxtilə tez-tez onun ziyarətinə getdiyini bildirib: “Bir gün yenə yanına getmişdim. Otağında onu gözləyirdim. Birdən səs-küy qopdu. Onun olduğu yerdə belə səslərin gəlməsini heç vaxt eşitməmişdik. Sonra mən qapını açdım. O, gözümün önündə Cevdet Türkoğlunu (camaatın bir nömrəli imamı. “Uzun Cevdet” ləqəbi ilə tanınır – red.) təpik-yumruqla döyürdü”.

H. Gülərcə qeyd edib ki, camaata bağlılığın səbəbi hipnozdur.

“Bunun adına Gülənizm deyilir. Təxminən 10 il öncə Fatihdə camaat şagirdlərinin qaldığı yerə getdim. Burada onlara kitab oxudulur, videolar izlədilir. Beləliklə, onların beyinləri yuyulur və “Xidmət” adı altında istifadə olunurlar. “İşıq evləri”nə gedən uşaqlara çox yaxşı dərs keçirlər. Bir neçə həftə sonra ana-ata sevgisindən danışırlar və illüziya başlayır. Sonra o nadinc uşağın anasına çox mədəni yaxınlaşdığını görən ana və atalar gözlənilə inanmır və sevinirlər. Beləliklə onlar da təsir altına alınır. Əslində bu evlərdə yetişdirilənlər 15 iyulda dövlət çevrilişi etdilər”.

Gülərcə camaatın imtahan suallarını oğurladığı iddialarını təsdiqləyib: “17 dekabr hadisələrindən sonra bir akademik mənə yaxınlaşaraq dedi ki, sualların cavablarını mənə təklif etdilər. Lakin qəbul etmədim, çünki artıq “Xidmət” üçün çalışmıram. Bir dostum danışır ki, Fətullah Gülənin 17 dekabr hadisələri zamanı məşhur “bəd duasından” sonra Hakan Şükür Amerikaya gedir. Hakan Şükür Gülənə “əfəndim siz buna qarşılıqlı lənət oxuma deyirsiniz, amma Türkiyədə buna “bəd dua” deyirlər”. Gülən Şükürə “Hakan bəy, mən bunu öz başımdan demirəm” cavabını verir. O özünü “Mehdi” sayır. Buna özü də inanır. Mənə peyğəmbərlə görüşdüyünü də demişdi”.

H. Gülərcə ABŞ Mərkəzi Kəşfiyyat İdarəsinin (CİA) Fətullah Güləni dəstəklədiyini dəqiq bildiyini qeyd edib.

Asif