“FETÖ və İŞİD...” - Bərzani Ankaradan nəyi xahiş etdi?

Ankara səfərinin ikinci günündə mətbuat konfransı keçirən Şimali İraq regional kürd rəhbərliyinin başçısı Məsud Bərzani Türkiyə prezidenti Rəcəb Tayyib Ərdoğan və baş nazir Binəli Yıldırımla keçirdiyi görüşlərin nəticələri haqqında danışıb.

Publika.az Türkiyə mediasına istinadən xəbər verir ki, Bərzani prezident və baş nazirlə keçirdiyi görüşlərdə kürd muxtariyyətindəki FETÖ (Fəthullahçı Terror Təşkilatı) məktəblərinin müzakirə olunduğunu bildirib.

Kürd siyasətçi bu məktəblərdə təhsil alan şagirdlərin zərər görməməsi şərti ilə problemin həlli mövzusunda razılaşdıqlarını deyib. Bərzani həmçinin İŞİD terror təşkilatı ilə mübarizə mövzusunda razılaşdıqlarını vurğulayıb.

“Bölgədə böyük dəyişikliklər qapıdadır. Buna görə də həmrəylik və yaxınlaşmanın daha çox olması lazımdır. Türkiyədə sülh prosesi çox əhəmiyyətlidir, ancaq bunun üçün daha çox işə və zamana ehtiyac var. Ümidsiz deyilik. Təəssüf ki, keçən müddət ərzində pis hadisələr baş verdi. Sülh prosesinin yenidən başlanması üçün xahiş edirəm”, - Bərzani qeyd edib.

O, səfərin gedişatında ikitərəfli ticarət, siyasi və təhlükəsizlik əlaqələrinin inkişaf etdirilməsinin, həmçinin Ərbil-Bağdad arasındakı əlaqələrinin müzakirə olunduğunu dilə gətirib.

Ömər Dağlı