Monqolustan bu ölkələrdən tələb etdi: Sərvətimizi qaytarın

Monqolustan Britaniya və digər ölkələrdən, bəzilərinin iki min il əvvələ aid olan yüzlərlə mədəni əsəri qaytarmağı tələb edir.

Publika.az yazır ki, bu barədə "Reuters" məlumat yayıb.

Monqolustan hökumətinin bəyanatında deyilir ki, əsas artefaktlar arasında Monqolustanın ilk baş nazirinin Çinin Mançu sülaləsindən müstəqilliyini elan edən məktub da var. Bu məktub hazırda Londondakı Britaniya Kitabxanasında saxlanılır.

XIII-XIV əsrlərdə bir neçə monqol hökmdarının saraylarında işləmiş dövlət xadimi Rəşid əd-Dinlə bağlı əşyalar isə Edinburq muzeyində qorunur.

Monqolustan höküməti bir çoxu Avropa muzeylərində saxlanılan mədəni və tarixi əsərlərin geri qaytarılmasını tələb edir.

Qeyd edək ki, Monqolustan mədəni sərvətlərinin qaytarılmasında müəyyən irəliləyiş əldə edib. Bu ilin əvvəlində ABŞ Monqolustandan götürülmüş dinozavr qalıqlarını, o cümlədən 70 milyon il əvvəl yaşamış Tyrannosaurus rex-in daha kiçik versiyası olan Alioramusun kəlləsini geri qaytarıb.

Ötən həftə Rusiyada keçirilən forumda Monqolustan mədəniyyət naziri Nomin Çinbat da Moskvadan bir əsr əvvəl tədqiqat və bərpa üçün Rusiyaya göndərilmiş artefaktların, o cümlədən 2000 il bundan əvvəl Xiongnu sülaləsinə aid artefaktların geri qaytarılması üçün kömək istəyib.

Cəmilə