ABŞ-da Kipr görüşü: Razılaşma əldə edildi

Şimali Kipr Türk Cümhuriyyəti (KKTC) və Cənubi Kipr Rum Administrasiyası liderləri ABŞ-da bir araya gəlib və tezliklə baş tutacaq növbəti görüş barədə razılaşıblar.

Publika.az xəbər verir ki, qeyri-rəsmi görüş Nyu-Yorkda Birləşmiş Millətlər Təşkilatının (BMT) baş katibi Antonio Quterreşin ev sahibliyi ilə baş tutub.

KKTC prezidenti Ersin Tatar Quterreşlə növbəti görüşün Türkiyə və Yunanıstanın iştirakı ilə keçirilməsinin razılaşdırıldığını bəyan edib.

Tatar həmçinin Cənubi Kiprin lideri Nikos Hristodulidis ilə Kipr adasında görüşərək yeni sərhəd qapılarının açılması məsələsini müzakirə etmək qərarına gəldiklərini və tələblərin məqbul olacağı təqdirdə bunun baş verəcəyini bildirib.

BMT-nin sözçüsü Stefan Dujarrik qeyd edib ki, görüş zamanı Quterreş iki lideri mübahisələri həll etməyə və həll yolunda irəliləyişə imkan verəcək etimadı bərpa etməyə təşviq edib.

"Liderlər tezliklə baş katibin nəzarəti altında daha geniş, qeyri-rəsmi görüş keçirməklə irəliyə doğru addımları müzakirə etmək barədə razılığa gəliblər. Onlar həmçinin yeni keçidlərin açılması imkanlarını araşdırmaq üçün Kiprdə görüşməyə razılaşıblar", - deyə sözçü vurğulayıb.

Qeyd edək ki, BMT-nin vasitəçiliyi ilə keçirilən son danışıqlar 2017-ci ildə uğursuz olub.

Roza Şəfiyeva