Yəməndə hökumət istefa verdi

Paytaxt Sənada prezident sarayının Husilər tərəfindən tutulmasından sonra Yəməndə hökumətin istefa verdiyi xəbəri yayıldı.

Publika.az-ın “Anadolu” xəbər agentliyinə istinadən verdiyi məlumata görə, adının açıqlanmasını istəməyən yüksək vəzifəli hökumət səlahiyyətlisi hökumətin istefa ərizəsini prezident Abdurabbu Mansur Hadiyə təqdim etdiyini bildirib.

Xatırladaq ki, yanvarın 20-də hakimiyyətə qarşı çıxan Husi tayfasının döyüşçüləri paytaxt Sənadakı prezident sarayını ələ keçirib. Dünən isə Yəmən prezidenti üsyançıların tələblərini qəbul edib. Şiə qruplaşmasının tələbləri konstitusiyadakı “səhvlər”in düzəldilməsi ilə bağlıdır. O, Milli Dialoq üzrə Konqresin qərarlarının həyata keçirilməsini sürətləndirməyi və təhlükəsizliklə bağlı problemləri dərhal həll etməyi tələb edib.

Qeyd edək ki, Yəmən Milli Dialoq üzrə Konqresin baş katibliyi bu həftədə yeni konstitusiya layihəsinin əsas müddəalarını dərc edib. Dəyişikliklərdə Yəmənin dördü şimal və ikisi cənub olmaqla altı regiondan ibarət federativ dövlətə çevrilməsini nəzərdə tutur. Dövlətin paytaxtı Səna xüsusi statusa malik olacaq və regionlardan heç birinin tərkibinə daxil olmayacaq.

Ömər Dağlı