Kim Çen İndən növbəti montaj oyunu

Su altından qitələrarası nüvə raketi atdığını iddia edən Şimali Koreya dünyanı montajla aldadıb.

Publika.az xarici mediaya istinadən xəbər verir ki, bu iddia ilə Qərb mütəxəssisləri Markus Şiller və Robert Şumuker çıxış edib.

Şimali Koreya su altından qitələrarası nüvə başlıqlı raket atdığını iddia edir. Sınaqların şəxsən dövlət başçısı Kim Çen İn tərəfindən idarə olunduğunu göstərən görüntülər dərc olunub. Görüntülərin montaj olduğunu bildirən mütəxəssislər Şimali Koreyanın nüvə sövdələşməsində mövqeyini gücləndirmək üçün hər zamankı oyunu oynadığını deyir.

Qərbli mütəxəssislər Şimali Koreyanın su altından nüvə raketinin sınağını həyata keçirmək gücündə olmadığını bildiriblər.

Markus Şiller və Robert Şumuker Şimali Koreya tərəfindən dərc olunan görüntülərin üzərində “çox incə bir iş” aparıldığını iddia edib. Onların sözlərinə görə, peyk fotoşəkillərinə baxılanda ortaya daha fərqli görüntülər çıxır.

Raketin suyun səthinə çıxdığı anda suyun hərəkətini araşdıran mütəxəssislərin fikrincə, suyun hərəkəti də görüntülərin “montaj” olduğunu açıq şəkildə ortaya qoyur.

Ömər Dağlı