“Əsrin müqaviləsi”nin müddətinin uzadılması Azərbaycana nə verəcək? - Açıqlama

SOCAR və BP-nin əməliyyatçısı olduğu ABƏŞ Azəri-Çıraq-Günəşli yatağının 2050-ci ilədək gələcək işlənməsinə dair razılaşmanın prinsiplərini imzalayıblar. Bu razılaşma AÇG yatağının 2050-ci ilədək işlənməsini əhatə edəcək və əsrin ortalarınadək əhəmiyyətli həcmdə ehtiyatların işlənməsi potensialını əlavə edəcək. Hazırda AÇG-dən hasilat gündəlik təxminən 620000 barel neft ekvivalenti səviyyəsindədir

Nəzərə çatdıraq ki, ABƏŞ səhmdarları “BP”, “Chevron”, “İNPEX”, “Statoil”, “ExxonMobil”, “TPAO”, “İTOCHU” və “ONGC Videsh” şirkətləridir.

“Əsrin müqaviləsi”nin müddətinin uzadılmasını Publika.az-a şərh edən Neft Araşdırmalar Mərkəzinin rəhbəri İlham Şaban bildirdi ki, müqavilənin müddətinin uzadılması gözlənilən idi:

“İndiyə qədər Azəri-Çıraq-Günəşli yatağından cəmi 3 milyard barel neft hasil edilib. Bu heç yarısı da deyil. Bundan sonra daha 4 milyard barel neftin hasilatı planlaşdırılır”.

Müqavilənin müddətinin uzadılmasının Azərbaycan üçün müsbət tərəflərinə toxunan iqtisadçı bildirir ki, ilk növbədə xarici şirkətlər ölkəyə investisiya yatıracaqlar:

“Bu çox milyardlı investisiyaların layihəyə cəlb edilməsi deməkdir. Digər tərəfdən hasilatın stabilləşməsi üçün çox yaxşı şərait yaranacaq. Azəri-Çıraq-Günəşli blokunda yeni platformanın tikintisi nəzərdə tutulur. Bunun nəticəsində hasilat stabilləşəcək. Müəyyən dövr üçün ölkəyə müntəzəm neft gəlirləri daxil olacaq. Hansı ki, bu vəsait də Neft Fondunda toplanacaq”.

İqtisadiyyat şöbəsi