“Cənub Qaz Dəhlizi” Avropanın enerji xəritəsini dəyişən layihədir” - Yusif Bağırzadə

“Cənub Qaz Dəhlizi” öz həcminə və əhəmiyyətinə görə Avropanın enerji xəritəsini dəyişən bir layihədir”.

Bunu Publika.az-a açıqlamasında politoloq Yusif Bağırzadə deyib.

Onun sözlərinə görə, layihənin həyata keçirilməsi ilə Xəzər hövzəsi qazı Avropaya ötürüləcək: “Bu, Aralıq dənizi bölgəsində olan dövlətlərin Xəzərdə olan qazla qovuşmasına gətirib çıxaracaq. “Cənub Qaz Dəhlizi” əhəmiyyətinə görə 90-cı illərin əvvəllərində ulu öndər Heydər Əliyev tərəfindən əsası qoyulmuş “Bakı-Tbilisi-Ceyhan” layihəsinə analoji bir layihədir. Yəni bu, faktiki olaraq hazırda Azərbaycanın Avropa və dünyaya verdiyi böyük bir enerji töhfəsidir. Bu ağır vaxtlarda, yəni Rusiya və Türkmənistan qazının kifayət qədər alıcı tapmadığı dövrdə əsası ulu öndər Heydər Əliyev tərəfindən qoyulan “Bakı-Tbilisi-Ceyhan” layihəsi və əsası Prezident İlham Əliyev tərəfindən qoyulan “Cənub Qaz Dəhlizi” Azərbaycan üçün çox önəmli hadisədir. Bu, həm də Azərbaycanın Avropanın iqtisadi məkanına inteqrasiya etməsi deməkdir. Sözügedən kəmərin Gürcüstan, Türkiyə, Yunanıstan, Bolqarıstan, Albaniya və İtaliyaya nəql olunması o deməkdir ki, Azərbaycan Avropaya iqtisadi inteqrasiya edir".

Y.Bağırzadə bildirib ki, gələcəkdə Türkmənistan qazının da bu xətt vasitəsilə Azərbaycan üzərindən Avropaya nəqli gözlənilir.