Neftin qiyməti ən yüksək səviyyəyə QALXDI

Sentyabrın 12-də keçirilən ticarət zamanı "Brent" markalı neftin qiyməti keçən ilin noyabrından bəri ən yüksək səviyyəyə qalxıb.

Publika.az xəbər verir ki, ICE birjasının məlumatına görə, noyabr fyuçersləri 1,78 faiz artaraq bir barel üçün 92,31 dollar olub.

Eyni zamanda, "Texas WTI" markalı neftin də qiyməti yüksəlir. Oktyabrda çatdırılma fyuçersləri 2,15 faiz bahalaşaraq bir barel üçün 89,17 dollar olub.

Bakı vaxtı ilə saat 17:52-də qiymət bir qədər geriləyib: Brent fyuçersləri 91,96 dollar səviyyəsində ticarət edilib.

OPEC-in proqnozlarına görə, 2023-cü ilin dördüncü rübünün sonuna qədər qlobal neft ehtiyatlarının azalması gündə təxminən 3,3 milyon barel təşkil edə bilər. Bu azalma ən azı 2007-ci ildən bəri ən böyük azalma riskini daşıyır.

Müstəqil ekspertlər də hesab edirlər ki, neft qiymətlərində artım tendensiyası 2023-cü ilin sonuna qədər davam edəcək.

"Etiraf edirəm ki, qiymət ilin sonuna kimi 90-100 dollar/barel arasında dəyişəcək və gələn il də eyni diapazonda qalacaq və ya çox dəyişməyəcək. Yəni qiymətin qəfil enməsi və ya qalxması üçün ciddi səbəb görmürəm", - analitik Vladimir Demidov öz proqnozunu bölüşüb.

Hüseyn İbadlı