Polis azarkeşlərin üstünə silah çəkdi - FOTO

Braziliya çempionatının 35-ci turunda çempionun adına aydınlıq gəlib.

Publika.az xəbər verir ki, səfərdə autsayder "Vasko da Qama"yla bərabərə qalan (1:1) "Korintians" ən yaxın izləyicisi "Atletiko"nun (Mineyro) səfərdə "Santos"a məğlub olmasıyla (2:4) çempionluğunu rəsmiləşdirib. Bu, "Korintians"ın sayca 6-cı çempionluğudu.

Oyundan sonra komandalarının çempionluğunu bayram edən "Korintians" azarkeşləri az qala faciəylə üzləşəcəkdi. Belə ki, "ağ-qaralar"ın azarkeşləri çempionluq sevincini yaşayarkən, klubun əzəli rəqibi "San-Paolo"nun formasını geyinmiş bir şəxs əlində silah, motosikletlə kütlənin arasına daxil olub. O, polis olduğunu deyərək azarkeşlərə hədə-qorxu gəlib.

Bundan sonra naməlum şəxslə "Korintians" azarkeşləri arasında vəziyyət gərginləşib. Belə ki, polis olduğunu iddia edən şəxsin hədə-qorxularına dözməyən bir qrup fanat onu sıxışdırmağa və formasını çıxarmağa çalışıb. Vəziyyətin gərginləşdiyini görən polislər gözyaşardıcı qaz buraxaraq, kütləni dağıdıb.

Naməlum şəxs isə kütlənin arasında yoxa çıxıb.