“Qarabağ”ın qrupdakı rəqiblərini TANIYAQ

Bu gün Avropa Liqasının qrup mərhələsinin püşkü atılıb. Azərbaycanı “Qəbələ”ylə birgə qrup mərhələsində "Qarabağ" təmsil edəcək. “Köhlən atlar” Avropa Liqasının qrup mərhələsində İtaliyanın "Fiorentina", Yunanıstanın PAOK və Çexiyanın "Slovan" klubları ilə birlikdə J qrupunda mübarizə aparacaq.

Publika.az “Qarabağ”ın rəqibləri haqda ətraflı məlumatı təqdim edir:

Fiorentina (İtaliya)

“Fiorentina” klubu 1926-cı ildə yaradılıb və İtaliyanın Florensiya şəhərini təmsil edir. Komanda indiyə qədər ikiqat İtaliya çempionu, 6 dəfə İtaliya kuboku və bir dəfə də İtaliya superkubokunun qalibi olub. “Fiorentina” iki dəfə UEFA kubokunun finalında iştirak edib. Ötən mövsümü isə İtaliya A seriyasında beşinci pillədə başa vurub və Avropa Liqasının qrup mərhələsinə birbaşa vəsiqə qazanıb.

“Fiorentina”nın ləqəbi “bənövşəyilər”diR.

Komanda ev oyunlarını 47 min 282 nəfərlik tutuma malik olan “Artemio Franki” stadionunda keçirir.

Hazırda komandanın baş məşqçisi portuqaliyalı Paulu Souzadı və “Fiorentina” UEFA-nın klubların reytinq sıralamasında 34-cü pillədə qərarlaşıb.

Rəqibimizin hazırki heyətində Argentina, Polşa, Sloveniya, Çili, Xorvatiya, İspaniya kimi ölkələri təmsil edən futbolçular çıxış edir.

PAOK (Yunanıstan)

PAOK-un əsası 1877-ci ildə, İstanbulda qoyulub. Ancaq klub həmin illərdə futbol yox, idman klubu kimi fəaliyyət göstərirdi. "Ağ-qaralar" türklərlə yunanlar arasında müharibə başladıqdan sonra Salonikiyə köçməyə məcbur olur. 1926-cı ildə isə futbol klubu kimi fəaliyyət göstərməyə başlayır. Komandanın adı dörd sözün birləşməsindən yaranıb. PAOK - Panthessalonikeios Athlitikos Omilos Konstantinoupoliton (Konstantinapolun Pan-Saloniki İdman Klubu).

Klub Yunanıstan nəhənglərindən sayılmasa da, bu ölkənin sayılıb-seçilən komandalarındandır. "Ağ-qaralar" iki dəfə Yunanıstan çempionu olmaqla yanaşı, 4 dəfə də ölkə kubokuna sahib çıxıb.

PAOK ötən mövsüm Yunanıstan Super Liqasını 4-cü pillədə başa vurub.

Komandanın baş məşqçisi serbiyalı Vladimir İviçdir.

Rəqibin heyətində yunanıstanlı futbolçular çoxluq təşkil etsə də, Braziliya, İspaniya, Argentina kimi ölkələrdən də legioner futbolçuları var.

Komanda ev oyunlarını 28700 yerlik "Tumba" stadionunda keçirir. PAOK-un ev oyunlarında bir qayda olaraq anşlaq olur.

PAOK UEFA klubların reytinq sıralamasında 67-ci pillədə qərarlaşıb. Rəqibimiz bu mövsüm Avropa Liqasının pley-off mərhələsində mübarizəyə başlayıb və bu mərhələdə Gürcüstanın "Dinamo" klubunu iki oyunun nəticəsinə görə 5:0 hesabıyla məğlub edərək mübarizədən kənarlaşdırıb.

Slovan (Liberets, Çexiya)

“Slovan” klubu 1958-ci ildə yaradılıb və Liberets şəhərini təmsil edir. Komanda ev oyunlarını 9 min 900 yüz nəfərlik tutuma malik olan “U Nisı” stadionunda keçirir.

“Slovan” üçqat Çexiya çempionudur və iki dəfə də ölkə kubokunun qalibi olub. Ötən mövsüm isə çempionatın bürünc mükafatçısı olub.

Komandaya çexiyalı İndrix Trpisovski rəhbərlik edir.

Komandanın heyəti əsasən yerli futbolçulardan ibarətdir, cəmi 5 legioner futbolçusu var (ikisi Slovakiya, ikisi Rusiya və biri isə Nigeriyanı təmsil edir).

Liberets təmsilçisi hazırda UEFA klubların reytinq sıralamasında 81-ci pillədə qərarlaşıb.

“Slovan” bu mövsüm Avropa Liqasının 3-cü təsnifat mərhələsində mübarizəyə başlayıb. Bu mərhələdə Avstriyanın "Admira", pley-off-da isə Kiprin AEK (Larnaka) komandasını mübarizədən kənarlaşdırıb.